Bed departementet får ned ventetida på spelemidlar

I Vestland var ventetida for å få spelemidlar til anlegg for idrett og fysisk aktivitet i år om lag 3,5 år. No bed fylkesutvalet Kulturdepartementet gjera noko for å endra på dette.

Med ei ventetid på 3,5 år var Vestland saman med Nordland det fylket med lengst ventetid for å få spelemidlar i 2021.

– Det er ei kjempeutfordring å få bygd anlegg med den lange ventetida vi har sett døme på i Vestland. Og det er særleg utfordrande for dei gode initiativa i frivillig sektor. Lag og organisasjonar må gjerne ta opp midlertidige lån, eller dei må rett og slett venta med bygging. Vi har høge politiske ambisjonar i Vestland, for å leggja til rette for idrett og fysisk aktivitet for alle og over heile fylket. Men slik det er i dag, får vi for lite pengar frå departementet til å oppfylla ambisjonane våre, seier fylkesordførar Jon Askeland i ei pressemelding.

Fylkesutvalet vedtok fråsegna til Kulturdepartementet i sitt møte 22. september.