– Det var ubeskriveleg deilig

Etter ei lang rekkje med pallplasseringar i Norgescupen, gjekk Vidar Mehl sin draum om siger endeleg i oppfylling då han sykla inn til ein fyrsteplass i Nordsjørittet laurdag.

– Eg trur eg har ti pallplassar i norgescupen, så det var jaggu meg på tide. Og det var ubeskriveleg deilig. Det var faktisk såpass at eg nesten fekk ei tåra i augekroken då eg skjønte at dette kom til å gå, seier Vidar.

Kanskje var det ekstra spesielt at karrierens fyrste norgescup-siger skulle koma akkurat i Nordsjørittet. Det etter at han i fjorårets utgåve måtte sjå at sigeren glapp som følgje av ei punktering.

– Eg har tenkt på dette løpet heilt sidan i fjor, eg har tenkt at eg skal fader meg klara det i år etter det som skjedde i fjor. Og det gjorde eg, seier han.

I tillegg til at formen er på topp, passa også løypeprofilen i det 118 kilometer lange rittet som hand i hanske for omvikdelingen.

– Det gjekk fort frå start av, noko som passar meg. Då vert folk slitne mot slutten, medan eg er av den seige typen og er ofte best på slutten. Så eg køyrde frå dei mot slutten, og sykla så og seia åleine dei siste 15 kilometerane, seier han.

Vidar sykla i mål etter 3 timar og 30 minutt på sykkelsetet, han knuste med det all motstand og måtte venta to minutt før nummer to kom i mål.

Til helga er den allsidige syklisten klar for å nå nye milepålar. Då ventar nemleg årets NM.

– Eg skal ikkje leggja skjul på at eg har lyst til å koma på pallen og ta min fyrste NM-medalje. Men det er eit nytt løp, og det er ikkje berre enkelt å motivera seg på nytt etter å ha nådd ei langvarig målsetning no i helga. Men eg skal gje alt og formen er i alle fall på topp, seier han.