Endre fekk fødselen av sin førstefødde direkteoverført på Messenger
Endre Bakke Leikvoll (25) frå Dimmelsvik fekk ikkje vera til stades då sonen Didrik kom til verda førre søndag. Men heldigvis for han fekk jordmødrene på Stord sjukehus ein glitrande idé.
Søndag 15. mars vart Marie Oma (24) frå Stord og Endre Bakke Leikvoll foreldre for første gong. Men det skjedde ikkje utan dramatikk for barnefar og omvikdeling Endre. To timar før han skulle reisa frå heimen deira i Omvikdalen og over til sambuar Marie på Stord, byrja han å brygga på noko.
Artikkelen held fram under annonsen.
– Eg kjente meg litt pjusk, rett og slett. Eg hadde vondt i halsen og var forkjøla. Så eg ringte til fødeavdelinga på Stord for å høyra om eg kunne komma, men fekk då klar beskjed om at det var uaktuelt om eg hadde symptom, seier Endre.
Direktesendt premiere
Han pakka då med seg det viktigaste, ikledde seg munnbind og eingongshanskar og reiste over til Stord for å levera frå seg diverse ting til Marie og svigerforeldra. Men medan Marie reiste til sjukehuset, måtte Endre reisa heim igjen til Dimmelsvik.
– Det var ikkje så mykje eg kunne gjera i grunn, utan å uroa meg. Ein føler seg litt hjelpelaus når ein sit i ein eigen kommune. Det sat langt inne å ikkje kunna vera med, seier Endre.
Men heldigvis fekk jordmødrene ein glitrande idé. For alle første gong vart ein fødsel direkteoverført på Stord sjukehus.
– Eg fekk med meg over Messenger. Det var litt snodig, men dei på sjukehuset var utruleg flinke å gi informasjon, så eg visste heile tida kva som kom til å skje og kva som kunne skje. Dei var veldig flinke, seier Endre og legg til:
– Vi er dei første som har fått direkteført ein fødsel frå Stord sjukehus. Sjølv om eg aller helst skulle vore med, så er eg glad eg fekk ta del i det då eg først ikkje kunne vera til stades, seier den nybakte faren til vesle Didrik.
Vindaugsbesøk
Artikkelen held fram under annonsen.
Etter fødselen var Endre i karantene og måtte venta heilt til fredag i førre veke før han fekk helsa på sin nybakte son.
– Det var heilt magisk. Eg var livredd for at eg skulle øydeleggja han i starten, og var redd for alt. Men det gjekk seg til fort og det tok ikkje mange timane før eg følte at eg hadde kjent han heile livet mitt, smiler Endre.
No er dei nybakte foreldre heime med Didrik i Dimmelsvik, friske og raske alle saman.
– Vi har det veldig bra, alt er berre velstand. Vi sit her som to utkvila foreldre ei veke etter fødsel. Men det er framleis forholdsreglar vi må ta. Didrik har ikkje fått helsa på besteforeldra sine i Dimmelsvik endå, men dei har vore her på vindaugsbesøk til han, seier han.