Nye utleigehytter på Varaldsøy

Trass noko skepsis frå SF gjekk forvaltningsutvalet førre onsdag samrøystes inn for at Christer Svindland får byggja utleigehytter og naust i Raudholmvika på Varaldsøy.

Svindland fremja ein detaljplan for å kunna byggja to store utleigehytter av høg standard, inntil fire naust, småtbåtanlegg for ti båtar og utvida moloen. Marit Teigen (SF) tykte det er positivt at gardsbruket til Svindland ynskjer ei tilleggsnæring, men drista seg til å føreslå nokre endringar i planen.

– Om eine hytta kunne blitt trekt oppover og flytta lengre nord, så hadde området fått betre universell utforming og ålmenta betre tilgang. Når hytta ligg så tett ved sjøkanten vil det verka privatiserande, og det blir lite felles tumleareal, vurderte Teigen. Ho føreslo også å fjerna overbygget på flytebryggja og å korta inn moloen.

Kai Morten Torget (Frp) meinte slike ting ikkje var opp til utvalet å vurdera, mellom anna fordi reguleringsplanen er i samsvar med kommuneplanen.

– Å påpeika at «eg synest hytta skulle lege slik og slik» har ikkje utvalet noko med, etter mitt syn. Eg synest det blir feil å gjera endringar i denne reguleringsplanen, sa han.

 

Formannskapet

Anbjørn Høivik frå administrasjonen meinte det var forsvarleg å godkjenna saka slik ho låg føre med positiv innstilling.

– De har fått saka fordi dette er skjønnsmessigt, men det er noko seint å endra, forklarte han.

– Greitt, då kjem eg heller sterkare attende seinare, smilte Marit Teigen. Reguleringsplanen vart då samrøystes vedteken.

Saka var oppe i formannskapet på torsdag. Hege Lægreid Røssland fremja dei same synspunkta som partikollega Marit Teigen, men gjorde som ho og røysta for planen. Dermed vart det samrøystes der også. Saka skal no til kommunestyret.