– Dette er jo eit kunstverk

Ove Tvedt er no blitt overrekt karikaturteikninga som stadfestar at han er kåra til «Årets namn i Kvinnherad 2016». Og teikninga såg verkeleg ut til å falla i smak.

– Fantastisk. Og dette har han klart å få til?

Ove Tvedt humrar godt når han snur ramma og ser kva som skjuler seg på andre sida.

– Dette var flott, du verda. Kva er det ikkje han har fått til? seier Ove etter å ha studert teikninga litt grundigare, før han humrar endå meir og høgare enn fyrste gong.

Og det er mykje å studera på. For Ove er så aktiv i mange samanhengar at teiknaren Eivind Bøvor valde å dela biletet inn i fire. Oppe til venstre ser vi Ove som ynskjer velkomen til «Ope hus» i Valen kyrkje. Ungdomane strøymer inn døra. Dei tre bakarste ser noko opprørske ut; den eine guten røyker, medan nestemann har glattbarbert hovud og piercing i øyra. Men på «Ope hus» skal dei.

I ruta til høgre ser vi Ove i kjent positur med hammaren i neven og Blådalshytta og Postvegen i bakgrunnen. Under til høgre er vinnaren i aksjon på Vardhaugselbasaren. I det siste feltet er Ove og kona Grete på Filippinane og hjelper dei fattige. Dei fire rutene er skilde med ein kross, lik den Ove sjølv laga til Valen kyrkje.

 

Superlativ

– Det liknar også. Han har gitt meg spinkle bein og akkurat passeleg med hår, smiler Ove, før han bryt ut i latter.

Alle dei seks føregåande vinnarane av «Årets namn» har også blitt tildelt ei karikaturteikning laga av Eivind Bøvor. Og vi kan med handa på hjarta seia at alle har blitt glade for premien. Smil og latter har vore melodien under overrekkingane. Ove Tvedt er ikkje noko unnatak. Han strør om seg med superlativ som imponerande, fantastisk og utruleg.

– Dette er jo eit kunstverk. Eg lurer på kven som skal få arva det, spøkjer han.

– Dette skal vi finna ein heidersplass til, slår han fast.

 

Gode kandidatar

Om Grete har sett Grenda-bilen på tunet eller høyrt latteren, veit vi ikkje. Men ho kjem i alle fall ilande til for å ta ein kikk.

– Har du sett! Han har fått med mykje, seier ho.

– Dette biletet kan ein sjå lenge på, legg ho til.

At Ove var årets namn vart offentleggjort 29. desember. Etterpå ville sjølvsagt både valebuar og andre gratulera med heideren.

– Det er mange som har sagt at det er velfortent og slikt. Denne gongen var det svært gode kandidatar. At det var meg som vann, vart eg litt overraska over. Men sånn er det, det må eg tåla, opplyser Ove.