Fråværet halvert på KVV

Den mykje omdiskuterte fråværsgrensa har ifølgje Regjeringa gitt tydelege resultat. Og på Kvinnherad vidaregåande er fråværet for skuleåret som gjekk så godt som halvert i forhold til året før.

– Det var mykje diskusjon rundt fråværsgrensa når den blei innført, og vi var sjølv usikre på korleis det ville slå inn på dei elevane med størst utfordringar knytt til det. Men det ser ikkje ut til å ha hatt noko stor negativ effekt på dei, tvert i mot ser det ut til at fleire av dei kjem seg gjennom skuleåret. Og det er bra, seier rektor Audun Bjelland ved Kvinnherad vidaregåande.

 

Fleire fullfører

Talet på fråværsdagar har på landsbasis gått ned med 40 prosent i den vidaregåande skulen. I tillegg fortel Regjeringa at det er færre elevar som droppar ut av skulen i løpet av skuleåret og færre som ikkje får karakter i eitt eller fleire fag.

– Det gjeld også på KVV. Vi ser at det er fleire elevar på skulen, og det er fleire som fullfører med ståkarakter. Altså, det er færre som har fått karakteren 1 enn i tidlegare år, så vi ser heilt klart ein målbar effekt dette året. Så står det att å sjå om det kjem som følgje av at det er det fyrste året, eller om det vil gje ein langsiktig effekt, seier Bjelland.

 

Skaffar seg dokumentasjon

Rektoren er klar på at fråværsgrensa spelar ein stor rolle i dei gode fråværstala, og fortel at det har fått elevane til å ta større ansvar for sitt eige fråvær.

– Vi arbeidar heile tida på fleire ulike områder for at elevane våre skal føla at dei har det greitt på skulen. Men med fråværsgrensa så har elevane blitt flinkare til å skaffa seg dokumentasjon på fråværet sitt. Ungdommen er mykje meir bevisst på det no enn tidlegare, seier Audun Bjelland.

 

Halvert

For å få bort med skulking og elevane tilbake i klasserommet, bestemte utdanningsminister Torbjørn Røe Isaksen og Regjeringa å gå vekk frå dei lokale bestemmingane knytt til fråværsgrensa, og heller innføra ei nasjonal grense på ti prosent.

Noko som betyr at, etter innføringa i fjor haust, elevar mister retten til karakter i eit fag dersom dei har meir enn ti prosent ugyldig fråvær i faget. Ei regelendring som førte til ramaskrik både blant elevar og elevorganisasjonar då ho vart innført. Men som no ser ut til å ha gitt resultat.

I ein tabell frå Utdanningsforbundet som viser medianen for dagar og timar med fråvær for elevar i den vidaregåande skulen, kjem det fram at Kvinnherad vidaregåande har gått frå ein median på seks dagar og tolv timar i fråvær i 2015/16 til tre dagar og åtte timar i 2016/17.