Vel 500 påmeldte til seniormiddagar: - Eit etterlengta tilbod

Kvinnherad Frivilligsentral søkte om midlar til å arrangera festmiddagar for aldersgruppa 65+. Frå Statsforvaltaren fekk dei heile 250.000 kroner. No er det vel 500 seniorar og eldre påmeldte, og det vert arrangert seks middagar på ulike plassar i kommunen.

Middags-arrangementa startar i veke 35, frå måndag 30. august, til og med fredag 3. september. Vel 500 seniorar og eldre i Kvinnherad skal få møtast til trerettars middag og samvær, med ei lita eigenandel på 50 kroner.

Påmeldingsfristen var denne søndagen, og Veronika T. Thorsen i frivilligsentralen fortel at engasjementet rundt tilbodet har vore stort, frå alle plassar i kommunen. Det visar at det er eit kjærkome tiltak.

– Me fekk vel 500 påmeldingar til middagane, og det er veldig kjekt. Ein ser det har vore eit etterlengta tilbod. Då det var så populært, legg me opp til to middagar i Uskedalen. Me har diverre måtta avvisa nokon, då der er fult. Det er trist, men sånn er det, seier ho.