Har starta produksjonen av Salmon Eye

Austevoll-selskapet Fluctus AS er i gang med bygginga av Salmon Eye.

Eide Fjordbruk har signert ein nøkkelkontrakt med Austevoll-selskapet Fluctus AS for bygging av visningssenteret Salmon Eye.

– Det er svært gledeleg at eit selskap som me allereie har eit langt og godt samarbeid med, også blei dei rette for å byggja Salmon Eye. Fluctus tok utfordringa på strak arm, seier dagleg leiar Sondre Eide i Eide Fjordbruk i ei pressemelding.

Visningssenteret, som skal liggja på utsida av Snilstveitøy, har planlagd opning i løpet av neste år.

– Vi er stolte over å få vera med å realisera Salmon Eye, og produksjonen er allereie i gang. Våre tilsette har lang erfaring og kompetanse innan utstyrsleveranse til havbruksnæringa generelt og flåteproduksjon spesielt. Noko vi drar nytte av i dette prosjektet, seier flåteansvarleg Runar Hatlevik i Fluctus.

Heil-elektriske båtar

For å ta seg ut til visningssenteret i Hardangerfjorden, må dei tilsette sjølvsagt ta sjøvegen. For å gjera dette mest mogleg miljøvenleg, har Eide Fjordbruk tinga to heil-elektriske båtar av typen Flying Fish 37Z MK2 E-charge.

– Det har vore utfordrande å navigera i ein relativt ny marknad av elektriske båtar til dette føremålet. Hukkelberg Boats AS og Evoy AS er heilt framme når det gjeld elektrifisering, og me ser fram til å ta båtane i bruk. Dette er eit viktig steg for oss i vår strategi om å redusera karbonavtrykket vårt, seier teknisk sjef Erlend Eide i Eide Fjordbruk.

Tolv passasjerar

Den første båten vil bli levert til Eide Fjordbruk allereie i desember. Då startar også selskapet opp med prøvedrift og opplæring av båtførarar til visningsanlegget. Båtane, som er over elleve meter lange, vil kunna frakta opptil tolv passasjerar ut til anlegget i slengen.

– Vi er svært stolte og audmjuke over å ha blitt plukka ut som leverandør til Eide Fjordbruk på dette spenstige prosjektet. Med ei over 80 år lang verftshistorie, er dette ein spanande teknologi å ta fatt på, og vi ser fram til eit godt samarbeid med Eide Fjordbruk og Evoy, seier Øyvind Hukkelberg frå Hukkelberg Boats.