No er dagsturhytta på plass ved Nautavatnet

Dagsturhytta i Kvinnherad kom fredag på plass på tomta si ved Nautavatnet. Hytta er ferdigmontert og tett, men vil ikkje opna før i oktober.

Plasseringa av dagsturhytta vekte stort engasjement hjå innbyggjarane i Kvinnherad då saka var oppe til politisk behandling i fjor. Etter ein lengre prosess, landa Levekårsutvalet på Nautavatnet.

Laurdag 14. august kom hytta med båt til Kvinnherad, og vart lossa av i Vikjo i Dimmelsvik. Herifrå frakta Lyngnes transport hytta opp til parkeringsplassen i Fjellhaugen, før hytta fredag i førre helga vart hytta frakta med helikopter

– Hytta er no ferdigmontert og tett, men ikkje opna. Om tre vekers tid kjem Stad kystbygg for å ferdigstilla hytta innvendig og utvendig. Deretter står det att noko småarbeid fram til hytta opnar, vonleg i løpet av oktober, skriv folkehelsekoordinator Kristian Helgesen i Kvinnherad kommune i ei pressemelding.

Ope for skodelystne

Sjølv om hytta, som skal driftast av Kvinnherad Turlag, endå ikkje er opna, er det ingenting i vegen for å ta turen opp og sjå korleis det har blitt.

– Det er sjølvsagt ope for å ta turen opp for å sjå hytta utvendig no. Å sitja i solveggen mot Nautavatnet gjev allereie god le for nordavinden. Men ein må vera merksam på bandtvang, sidan det er mykje sau i terrenget frå Fjellhaugen og opp til Nautavatnet, står det å lesa i pressemeldinga.

Til dei som tek turen, skriv kommunen at ein kan vera budde på at det framleis er eit byggjeområde på tomta.

– Framover skal det plukkast sprengstein som ligg i terrenget, og arronderast rundt hytta. Saman med turlaget skal vi også prosjektera og setja i drift ein utedo, skriv kommunen.

Utsikt

Hytta, som består av fire element, har store vindaugsflater, som skal by på god utsikt både mot nord, sør og aust. Utvendig vert det to takutstikk som ein kan sitja under.

– Det er òg to tribunar felt inn i takkonstruksjonen som ein kan sitja i. Innvendig vert hytta innreidd med ein enkel vedomn, ein benk og ein hems. Hytta blir så utstyrt med ein minibibliotek, og eit solcelleanlegg til leselys og ein ei ventilasjonsløysing. Hytta skal ikkje nyttast til overnatting eller matlaging, skriv Helgesen og held fram:

– Publikum vil bli oppmoda om å ta av seg skoa før dei går inn. Det er mykje som talar for at publikum må bera med seg ved opp sjølve no i haust, medan endeleg vedløysing vil vera opp til turlaget og avgjera.

Om du har lyst å sjå korleis hytta har blitt, og samstundes vil bidra litt i arbeidet, inviterer Kvinnherad Turlag til dugnad fyrstkomande laurdag.

– Me håpar nokon har lyst og anledning til å vera med oss å plukka stein på tomta, skriv turlaget.