Fjelland debuterte for Stord

Patrick Solheim Fjelland (16) byta i januar gult og blått med kvitt og svart og skreiv under for Stord Fotball. Og allereie i helga fekk han sin seniordebut for 3. divisjonslaget.

Halsnøyguten, som stadig vekk var å sjå i aksjon på Nya Myro då Halsnøy i fjor berga plassen i 5. divisjon, valte i januar vekk seniorfotball i heimbygda til fordel for juniorfotball på Stord. Men allereie før sesongen er i gang, har den hardtarbeidande midtbanespelaren fått sin debut på seniornivå. Nemleg i helgas vinterseriefinale mot Åsane 2.

– Det var både uventa og veldig kjekt. I all hovudsak er eg tiltenkt ei rolle innan juniorlagsfotball denne sesongen, så det var lærerikt og spanande å få mitt fyrste kvarter no i helga, seier Fjelland.

 

Ambisjonar

Han går på vidaregåande skule på sommarøya, og har treningar like etter skuletid fem gongar i veka, noko som var med og bidrog til at avgjersla gjekk i Stord sin favør.

– Eg hadde eit val mellom Halsnøy og Stord etter førre sesong, og vurderte då treningskvardagen på Stord som betre. Eg har ambisjonar om å heile tida spela på eit så høgt nivå som mogleg, så det valet var eigentleg ganske greitt, seier Fjelland, som ikkje angrar eit sekund på valet han tok, og som no ser fram til ein god fyrstesesong i 1. divisjon på juniornivå.

– Eg er strålande nøgd. Kvaliteten og nivået på laget og treningane er bra, og eg stortrivst. Ambisjonen for sesongen er å gjera mitt besta, så får vi berre sjå om det er godt nok til at eg også kan få nokre minutt på seniorlaget ein gong i løpet av sesongen, slutta Fjelland.