Erling vann superfinalen i Tyrkia

Erling Hansen frå Halsnøy gjekk like så greitt hen og vann den store superfinalen i Belka Golf Nordic.

Erling Hansen har slite med ein skade som har heldt han vekke frå fotballbanen det siste året, på grunn av det bestemte han seg for å testa golfsporten. I si fyrste turnering, 10. juni i år, spelte han seg til topps i den lokale Belka-turneringa i Kvinnherad. I premie venta det deltaking i den nordiske superfinalen i Belka Golf Nordic i det tyrkiske golfmekka Belek.

Her konkurrerte han med flust av golfspelarar frå Sverige og Norge, og gjekk like greitt hen og vann heile turneringa.

– Eg forstår ikkje korleis det gjekk til, men det skjedde visst det, ler Erling.

Over to dagar med golf, der spelarane gjekk 18 hol begge dagane, enda unge, lovande Hansen med ti over par i sitt handikap. Det var nok til å trona øvst på heile resultatlista.

– Det bøtta ned begge dagane, skikkeleg godt, gamaldags vestlandsvêr. Så eg hadde på mange måtar heimebanefordel. Men eg reiste jo ikkje ned med noko forventning til at eg skulle vinna, men så leverte eg jamn og god golf, som til slutt førte til at eg vann. Så eg overraska nok både meg sjølv og andre, seier han før han legg til:

– Men det er jo handikapbasert dette her, så eg klarte ikkje å ta det heilt innover meg før eg var heime igjen i Norge, seier han.

 

Fekk god hjelp

Han skryt over miljøet i Kvinnherad golfklubb, og takkar særskild Håkan Björk for god rettleiing.

– Kvinnherad golfklubb var best representert der nede med åtte spelarar. Så det var både sosialt og kjekt. Alle vil kvarandre det beste, så når vi gjekk treningsrunden så såg Håkan at det var noko som ikkje stemte. Så han sa at eg burde retta litt på det eine og det andre. Etter det gjekk det veldig bra, så det var på mange måtar heile nøkkelen til at eg vann, seier Erling.

Som vinnar stakk Erling av med ein heilt ny driver og ei ny tralle til bagen. Så spørst det kor mykje han kjem til å bruka premien neste sesong.

– Hovudgrunnen til at eg har spelt golf i år er jo for at eg har vore skada frå fotballen. Men no er eg forhåpentlegvis frisk i beina igjen, og kan spela fotball neste sesong. Så det kan fort vera at det blir mindre golf i 2020. Men så er det jo veldig kjekt dette då, så vi får sjå, seier han.

Superfinalevinnaren haustar lovord også frå arrangør, Tore Halvorsen i Belka Golf Nordic.

– Han leverte veldig godt frå fyrste slag. Så det var ein fortent siger, seier han.