Billegare flytebru

Ferske kostnadskalkylar gjev oppløftande resultat for Fjelbergsambandet.

 

Ferjeavløysingsmidlane er heilt avgjerande for at Fjelbergsambandet skal la seg finansiera. Etter siste estimat utgjer dei nærare 17,4 millionar kroner årleg i 45 år, totalt 782 millionar kroner.

– Når det gjeld ferjeavløysingsmidlane så er det ingen konfliktar, for ein tek ikkje pengane frå ein felles pott. Det er ingen konkurranse mellom prosjekta, sa Sigbjørn Framnes (Frp) om dei ulike vegprosjekta som ynskjer slikt tilskot.

Reguleringsplanen for Fjelbergsambandet vart utarbeidd i ekspressfart hausten 2017. Den omfattar ei 700 meter lang flytebru frå Sydnes til Fjelbergøy, veg over den øya – delvis på eksisterande traktorveg, og ei nærare 200 meter lang ordinær bru over til Borgundøy. For flytebrua ynskjer ein ei innovativ løysing som inneber å nytta aluminium i staden for stål.

 

Kolonnekøyring

– Etter siste prognosar kan vi få prisen på ei slik flytebru ned i 400 millionar kroner, og då er totalsummen for prosjektet så godt som likt det vi kan få i ferjeavløysingsmidlar, opplyste Marianne Nordhus (Sp) på pressekonferansen på fredag.

– Samfunnsøkonomisk er det kjempelønnsamt, støtta Helge André Njåstad (Frp).

Han reagerte elles sterkt på at full pris for ein bil over Fjelbergsundet er så høg som 108 kroner.

– Vi kjempar for at dei som bur i distrikta skal sleppa den kostnaden berre for å handla på nærbutikken. Ferje er eigentleg ei gedigen kolonnekøyring med ekstremt høge bompengar, meinte Njåstad.