- Klipp hekken før skulestart!

Tette og bognande hekkar og buskvekstar har gode veksttilhøve gjennom somrane. Men når skulen snart tek til må den frodige estetikken vika for trafikktryggleiken. Dei mjuke trafikantane skal vera synlege.

Når det no nærmar seg skulestart er Trygg Trafikk ute med ei klar oppmoding: Tenk tryggleik og klipp hekken før skulestart. Oppmodinga om å finne fram hekksaksa går til dei som bur langs trafikkerte vegar.

– Små barn på skulevegen blir lett usynlege bak store hekkar og busker. Dette kan føre til farlege situasjonar i trafikken, skriv dei i eit brev til kommunen. Dei legg til at både sikt og informasjonstilgong på skilt og liknande vert dårlegare når planter veks seg for store langs vegen.

Barna må vera synlege

Fri sikt langs vegen er nedfelt i veglova. Denne seier mellom anna at ein skal ha minst 30 meter fri sikt i kvar retning langs gang- og sykkelvegen når ein står tre meter inn i ei avkøyrsle. Dersom avkøyrsla munnar ut i ein veg med 50-sone, må det vere fire meter fri sikt inn og 45 meter til kvar side når ein står i avkøyrsla.

Trygg Trafikk trur ikkje desse lovene er kjent for alle, og informerer difor om at det er dei som bur langs vegen som har ansvaret for å sjå til at buskvekstane dei har på eigedommen sin stettar krava i veglova.

– I desse dagar startar barna på skulen igjen og vi ynskjer at flest mogleg skal gå og sykle der det høver seg. Då må det leggast til rette for at det kan skje på ein sikker måte. Barna må vere synlege langs vegane, slår regionleiar i Trygg Trafikk Vestland, Knut Olav Røssland Nestås, fast.