Petol AS utvidar

Det går så det susar hos husnesbedrifta Petol om dagen. Nye kurstilbod er like rundt hjørna, og etter planen skal det òg setjast opp ein ny hall.

– Me har kjøpt ei tomt av Stripo Eigedom rett ovanfor her. Med fleire nye innkjøp av truckar og anna utstyr har vi behov for å få dei innandørs, fortel dagleg leiar Geir Ove Norheim.

Ein hall på 10x15 meter er klar for å setjast opp på den nye tomta som skal husa mellom anna ein nyare Volvo FH 16 med større kran, samt gaffeltruckar og anna utstyr.

– Me har fått mykje auke i oppdrag i det siste. Gode avtalar når det kjem til kursing, som krev at me har meir plass. I tillegg er det mykje aktivitet hos brannavdelinga vår, med mellom anna mange vedlikehaldsoppdrag. Det er travelt om dagen, og det er veldig kjekt, smiler Norheim.

 

Nye litiumsløkkjarar

Petol sel alt av brannutstyr, og i haust tok dei inn brannsløkkingsapparat eigna på brann i litiumbatteri, både handsløkkjarar og større.

– Med dei kan ein sløkkja brann i telefonar, el-sykkel og slikt. Seinare i år skal vi ha ei øving saman med importøren i Noreg, der me vil invitera mellom anna Kvinnherad brann og redning, fortel Norheim.

I tillegg til ulike truck- og krankurs, riggarkurs, førstehjelpskurs fallsikringskurs og kursing for varmt arbeid, skal dei no utvida kurstilboda. Dei har òg nyleg utvida arbeidsstaben frå fem heiltidstilsette til seks.

– Eg er veldig heldig som har med meg dyktige tilsette som gjer ein formidabel jobb. Utan dei hadde me ikkje kome så langt som me har gjort, smiler Norheim.