Langvarig driftstans i Matre

For fire veker sidan losna ein del inne i kraftstasjonen til SKL i Vik i Matre. Resultatet vert fleire månader utan straumproduksjon i anlegget.

– Me ventar å få avdekka omfanget av reperasjonane i løpet av to-tre veker. Men i beste fall står Blåfalli-Vik i ro til seinhausten. I verste fall går det langt fleire månader, seier informasjonssjef ved SKL, Jan Petter Myhre til Grenda.

Natt til 1. september losna ein vital del i statoren, inne i generatoren. Den gjorde stor skade på generatoren, førte til kortslutting på anlegget og røykutvikling inne i kraftstasjonen.

– Me har no demontert heile generatoren, slik at me får sett kva skadar som har skjedd. Det er viktig for oss å få avdekka alle skadane, få bestilt alle delane som trengs og få reparert generatoren. Her vert det gjort eit stort arbeid, både av våre eigne folk og av eksterne ekspertar, forklarer Myhre.

 

Forsikra

Produksjonstapet utgjer fleire hundre tusen i tapte kraftinntekter i døgeret.

– Heldigvis er me forsikra mot produksjonsavbrot som dette. Men det er ingen ønskesituasjon, for dette er alvorleg for oss. Den største kraftstasjonen til SKL står i ro, og det har konsekvensar, seier informasjonssjefen.

Ein av konsekvensane er at SKL ikkje lenger kan regulera Blådalsvassdraget slik dei kan når kraftstasjonen er i drift. Det blir synleg for publikum mellom anna ved at vatnet vil finna tilbake til den gamle vegen ut av Fjellhaugvatnet, altså ned elva, og til Indre Matre.

– Ein er i så måte tilbake til der ein var før 1950. Me må vedgå at me er litt uroa for at vasstanden kjem til å veksla med nedbøren, utan at me kan regulera han for mykje, fortel Myhre.

 

Godt tilsig

Den nye kraftstasjonen i Blåfalli-Vik opna i 2007 og erstatta dei fire generatorane som stod på Opstveit. Kapasiteten på den nye generatoren er så stor at kraftverket vanlegvis er stengt ned på nettene og i helgane.

– Der dei fire generatorane på den gamle stasjonen gjekk dag og natt, året rundt, kan me no i stor grad regulera når me har drift på kraftverket. Det betyr at me kan sjå på når det er behov for kraft i marknaden, og når betalingsvilja er størst, utdjupar Myhre.

Tilsiget til SKL sine stasjonar er som normalt, altså godt.

– Det regnar meir enn før, og Folgefonna ligg der og hjelper oss også. Dermed er det meir vatn for oss å sleppa gjennom. Såleis produserer me også meir straum dei seinare åra, tidlegare, fortel Myhre.

Skjønt, så lenge kraftstasjonen står i ro, blir det få kilowatt-timar produsert.

– Det er eit tidkrevjande detektivarbeid ein er i gang med no, men me må vera sikre på at me ikkje overser noko før me monterer generatoren på ny, sluttar Myhre.