Henta med luftambulanse

Ein mann i 70-åra vart henta med luftambulanse og frakta til Haukeland sjukehus etter å ha køyrt i ein krokkasse i Halsnøytunnelen torsdag morgon.

Like før klokka sju torsdag morgon rykte alle naudetatane ut til Halsnøytunnelen der ein personbil hadde køyrt inn i ein krokkasse som stod i vegbana. Krokkassen kan sjå ut som ein container, men vert nytta til å frakta blant anna asfaltutleggjarar.

Denne krokkassen hadde stått i vegbana sidan i går då transportøren fekk problem etter ei punktering. Og det var under lastinga av denne at bilisten i 70-åra kolliderte med gjenstanden. Mannen kom køyrande frå Halsnøy og var åleine i bilen. Politiet fekk fyrst meldingar om at han sat fastklemt, noko som viste seg å ikkje stemma. Skadeomfanget er framleis ukjent.

– Men han blir behandla som om det er alvorleg med tanke på at ulukka fann stad i ei 80-sone, og er no frakta til Haukeland sjukehus med luftambulanse, seier politiførstebetjent Torgeir Fosse ved Kvinnherad lensmannskontor.

Tunnelen var stengt i morgontimane og like etter klokka 9 meldte Politiet i Hordaland via sin Twitter-konto at dei opna for trafikk igjen.

– Involverte køyretøy er no fjerna og tunnelen er open igjen, skriv dei.