Hektisk program på Baroniet

Baroniet Rosendal har eit usedvanleg tettpakka kulturprogram den neste veka. Det byrjar i kveld med Karina Opdal, og så går det slag i slag til neste torsdag, då Maria Mena står på scena.

I kveld kan publikum få høyra Karina Opdal (song), Alex Hutton (klaver) og Magne Thormodsæter (kontrabass) i Riddersalen på Avlsgården. Trioen skal framføra musikk av mellom anna Kurt Weill, Cole Porter, Stephen Sondheim og George Gershwin.

Fredag kveld vert det konsert i Den røde sal med Diana Tishchenko på fiolin og Joachim Carr bak klaveret. På programmet står Beethoven sin sonate nr. 6, Schumann sitt Fantasiestücke, Schubert sin sonate i E-moll for soloklaver og Schubert sin Fantasi i C-dur.

På laurdag vert det underhaldning for barna. Dukketeateret Kaspar kjem attende for å visa dei to framsyningane «Det spøker på Rosendal» og «Kaspar på nye eventyr». Dette føregår ute i Borggården.

 

Føredrag

Same ettermiddag vert det invitert til spennande føredrag i Den røde sal. Ulf Holmene, fagdirektør hjå Riksantikvaren, sitt innlegg ber overskrifta «Han var et venligt Solskin i Qvindherreds dybe Vestenli - Christian Henrik Hoff-Rosenkrone, offiseren frå Holstein som vekte Baroniet Rosendal frå Tornerosesøvnen». Også uskedelingen Jørn Øyrehagen Sunde er med. Professoren skal fortelja om menneska og livet innanfor slottsmurane på fyrste halvdel av 1800-talet.

Søndag 9. juli vert det eit anna lokalt føredrag i Den røde sal. Magne Malmanger, professor emeritus, skal snakka om Marcus Gerhard Hoff Rosenkrone (1823-1896) si malerisamling på Slottet frå 1665.

 

Olava og Mena

Tysdag i neste veke kjem så Ingrid Olava for å halda årets fyrste Borggårdskonsert. Ho gjorde stor lukke førre gong ho spelte der. Dagen etter vert det to nye konsertar same stad, då med Thomas Dybdahl. Torsdag 13. juli står Maria Mena og bandet hennar på scena i Borggården, også dei skal gjennomføra to konsertar på éin kveld. Mena var på Baroniet for fyrste gong i fjor, og vart då så forelska i staden at ho både ynska å gjera Baroniet til «hytta si» og bli adoptert av bestyrarparet Anne Grete og Reidar.

Vi nemner også at den engelske teatergruppa neste helg skal framføra Shakespeare sin komedie «The Merry Wives of Windsor» i Borggården.