Dybdal med stjernekonsert

Onsdag kveld tok Thomas Dybdal med 270 publikummarar inn i ei verd med vare melodiar, sterk vokal og solid gitarspel.

Baroniet er midt inne i høgsesongen for kulturarrangement. Det heile vart sparka i gang med Ingrid Olava på tysdag, i kveld skal Maria Mena halda to utselde konsertar, og i artistgarderoben ventar både Shakespeare-teater og Bjørn Eidsvåg på tur.

Onsdag var Thomas Dybdal på scenen i Borggarden, berre i selskap med kassegitaren sin.

– Eg har gleda meg veldig til denne konserten, og er av den grunn litt nervøs. Men det skal nok gå bra, meldte den rutinerte artisten i opninga.

Og sjølvsagt gjorde det dét. Dybdal er trass alt ein framifrå gitarist, mellom anna med jazzbakgrunn, og han har ei stemme som lett matchar både store og små scenar. Kombinasjonen gjer han til ein singer-songwriter av internasjonalt kaliber.

 

Gull

Han gav oss både nytt og gamalt. Tittelsporet frå debutalbumet «That great october sound» kom, «Adelaide» var etterlengta og «Cecilia» baud på allsong. Undervegs i konserten skvatra skjorene og breka sauene med også. Publikum nytte framføringa til Dybdal, og han konsentrasjonen til kvar einskild konserten gjennom.

Så når han song «Life here is gold», så kunne det vore Baroniet han song om. For det var gull Dybdal leverte, og det var gull og vera der.

– Dette er den einaste plassen eg må be arrangøren om å skjenka litt mindre vin i glaset, kommenterte han undervegs, og artisten gav tydeleg uttrykk for at han gler seg til å koma tilbake til neste år.

– Takk! Me sjåast, avslutta Dybdal då han gjekk av scenen.

Det gjer me. Til neste år.