Murabotn var mellombels landingsstad

I helga var Murabotn i Rosendal landingsstad for helikopter. Baroniet Rosendal var blant dei lokale aktørane som hadde søkt om, og fått, løyve til motorferdsel i utmark.

Baroniet skulle frakta ved til hytta på Jakobsetre ved Prestavatnet i Hattebergdalen landskapsvernområde. I vurderinga av søknaden skreiv Folgefonna nasjonalparkstyre følgjande:

«Når man har bygningar i eit verneområdet, er det naturleg at det er behov for transport av forsyningar til desse bygningane. I fjellet over skoggrensa vil det oftast vere behov for å frakte ved til hytter og stølar. Dette er naturlege behov som legg til rette for normal og tradisjonell bruk av hytter og stølar. Det er og derfor opna for å kunne gje løyve til slik transport i verneforskrifta.»

Motorferdsla skulle skje med aktsemd og omsut for å unngå skade og ulempe for naturmiljø og menneske. Det såg den også ut til å gjera. Samstundes vart arbeidet ein attraksjon i seg sjølv for turfolket, noko som forsamlinga av publikum inst i Murabotn denne fine sundagen vitna om.

I tillegg til ved frakta helikopteret mellom anna materiale til vedlikehald av ei hytte i Geitebudalen. Denne skal Lars Ove Seglem restaurere.