A-laget til Halsnøy er klare for seriestart:- dette har me venta lenge på!

Regjeringa har letta på tiltaka i idretten, og A-laget til Halsnøy har endeleg fått grønt lys til å setja i gong igjen.

Breiddeidretten for utøvarar over 20 år har sidan mars i fjor vore hardt ramma av korona pandemien. Regjeringa har no letta på tiltaka i idretten, som er ein del av fase tre i gjenopninga av Noreg. Det er lov for alle med kontakt trening både inne og ute. Treningskampar er også mogleg.

Ei 15 månadar lang ventetid er difor over for A-laget på Halsnøy. Då Grenda var innom fotballtreninga deira torsdag, var det ekte fotballglede å sjå på grasmatta på Sæbøvik.

– Breiddeidretten har betalt ein stor nok pris no. Me er veldig glade for at me har fått grønt lys til å setja i gong igjen. Dette var ein fantastisk nyhende, seier trenaren til A-laget, Kjartan Mehammer.

Krevjande

Det er over 15 månadar sidan det var lov å trena med fysisk kontakt. I denne perioden har det heller ikkje vore nokon arrangement eller konkurransar.

A-laget hadde fotballtreningar frå mars til august førre året, og trena med ei tru på at Noreg skulle opna igjen. Men då det kom ei ny smittebølgje, sank motivasjonen. Idrettsbana var ikkje lenger ein fristad for Halsnøy-spelarane. Dessutan var dei i snitt åtta mann mindre på treningane i denne perioden.

– På denne tida var motivasjonen langt nede. Restriksjonane øydelagde for fotballgleda, fortel Trym Solheim Fjelland.

– Det var tungt å komma seg på trening. Det var lite variasjon i øvingane, så treningane blei svært einsformige, skyt Bjørn Einar Hvidevold inn.

Det vart for krevjande å organisera treningar i forhold til reglane om 1 meters avstand og ingen kontakt. A-laget hadde difor i haust ein lengre pause.

– Det siste året har vore veldig spesielt. Det har vore mange reglar å forholda seg til, difor var det krevjande å finna øvingar som gav spelarane noko. Etter kvart måtte ein innsjå at det vart for vanskeleg. Det er ein konkurranseidrett, så me trenar for å spela kampar, seier Kjartan.

– Det var ein nødvendig pause for oss. Motivasjonen var på botn, seier Trym.

I den vanskelege korona perioden gjorde trenarane til A-laget nokre tiltak for at spelarane skulle oppretthalde motivasjonen, og gleda for lagfotballen. Dei hadde mellom anna ein tur til Skånevik i fjor sommar. Her overnatta dei på Fjordhotellet.

– Formålet med turen var å byggja opp laget, og holda stemninga oppe. Me hadde ei treningsøkt på Skånevik stadion, og var på teambuilding i Villmarksparken, informera Mehammer.

– Det er kjekt at me har klart å få til noko i lag, men det har vore vanskeleg då reglane har satt ei stoppa for det, fortel Svein Bjørke. Den ivrige fotballspelaren frå Lyngstrand køyrer ein time kvar veg for å kunne trene med gjengen på Halsnøy. Det er rett fotballånd.

Høge ambisjonar

No som breiddeidretten har opna igjen, var det berre glade og ivrige spelarar å sjå på idrettsbanen.

Etter ein langvarig pause i vinter, starta A-laget til Halsnøy med treningar igjen i slutten av februar. No gler dei seg til sesongstart 28.august.

– No spela me fotball for å ha det gøy, slik at me får opp gneisten igjen. Opprykk er målet, men me tar ein kamp om gongen. Det blir spennande å sjå korleis me står i forhold til andre lag. Me har ikkje det grunnlaget me burde hatt, men er eit godt 6.divisjonslag, fastslår Mehammer.

– Det er ingen tvil om at me går for opprykk, slår Trym fast.

– Ambisjonane for den kommande sesongen er høge, supplera Svein Bjørke.

A-laget har no 18 ivrige spelarar som ser framimot sesongstart. Men laget står utan keeper.

– Me har behov for ein keeper. Og han kan me garantera speletid, seier Mehammer med eit blunk.

Den 14. august kan ein sjå Halsnøy spela treningskamp mot Trio. Det er alltid spennande, og mykje står på spel når desse to lokale laga møtes.

– Det gler me oss veldig til, avsluttar Mehammer.