Spennande samarbeid med TV 2

– Vi kan no offentleggjera eit kjempespennande samarbeidsprosjekt mellom Folgefonnsenteret og TV 2 Skole/Storm Geo, sa Knut Førland og Eli Kari Gjengedal under ein pressefrukost i dag.

Rosendal står på hovudet i samband med den store opninga av Folgefonnsenteret. Statsminister Erna Solberg er i bygda, det same er både NRK og TV 2. Spesielt sistnemnde slår på stortromma. Ikkje berre sender dei direkte frå bygda, selskapet har også teikna ein samarbeidsavtale med Folgefonnsenteret.

– Samarbeidet er relatert til formidling og læring av innhaldet i senteret. Folgefonnsenteret skal mellom anna vera med og utarbeida læremateriell til skulane, som vil bli formidla gjennom TV 2 Skole. Dette gjev senteret ei unik formidlingsmoglegheit, sa styreleiar Knut Førland i Stiftinga Folgefonnsenteret under samlinga på Rosendal Turisthotell.

 

Ekstra innslag

Eli Kari Gjengedal kom litt forseinka til pressetreffet.

– Vi måtte ha eit ekstra innslag herifrå på Nyhetene på grunn av det fine vêret, smilte ho.

Samarbeidet kom i stand etter at Knut Førland tok kontakt med Gjengedal for kring eit halvt år sidan. TV 2 sin vêrekspert var minst like entusiastisk som Førland over planane.

– Vi var veldig glade då Knut tok kontakt med oss. Vi ynskjer å bruka kunnskapen i Folgefonnsenteret til både formidling og kommunikasjon. På sikt vonar vi å få etablert ein stasjon på senteret, der dei besøkande kan laga si eiga vêrmelding. Men vegen blir til medan vi går, så førebels er det ikkje så mykje konkret, sa ho.

– Det er elles veldig viktig at folk som driv med forsking får spreidd den. Alt handlar om å fortelja ei historie, la ho til.

 

Imponert

Eli Kari Gjengedal fekk sjå senteret for fyrste gong måndag kveld.

– Eg vart kjempeimponert. Å gå frå fyrste etasjen der det handlar om havet og så enda på fonna, var heilt fantastisk. Det som føregår i havet er ekstremt viktig, for det fortel oss nesten alt om det som skjer i atmosfæren, opplyste ho.

7. klasse ved Malmanger skule har også vore engasjerte av TV 2 i dag. Elevar frå klassen skal dessutan stå ved kvar sin stasjon i senteret når statsministeren kjem innom. Gjengedal er svært glad for at skulen er med på denne måten.

– Vi må rekruttera ungdom til realfaga. Det er trass alt ikkje berre elendigheit som ventar oss i framtida, det er også mykje som gjev håp, sa Gjengedal.