– Klare til å bretta opp ermane og setja i gong

Frisørar rundt om i landet ventar spent på kva smittevernreglar dei må følgja når dei opnar salongane måndag. Blant dei er Trend Frisør på Husnes.

Over natta fredag 13. mars gjekk Trend Frisør, som mange av landets andre frisørsalongar, frå fulle bestillingslister og god inntekt til stengt frisørsalong og null kroner inn i kassa. Slik har det no vore i fem veker, men fyrstkomande måndag skal Nina Medhus, Beate Vimme, Brita Salomonsen og Ann Kristin Musland i Trend Frisør endeleg få opna igjen.

– Det har vore vemodig, men forståeleg at me har måtta halda stengt. Sånn som det utvikla seg før stenging så gjekk ein på jobb med ein frykt for å vera ei smittekjelde, seier Ann Kristin Musland.

 

Luksusproblem

Ho og hennar tre kollegaer i Trend Frisør på Husnes fekk berre halda ope ein månad etter at å ha pussa opp salongen i februar.

– Det er ikkje til å leggja skjul på at det har vore tørke. Vi har ein innarbeidd salong med fulle lister heile året, så gjekk vi plutseleg frå hundre prosent til null. Det er ikkje berre lett, men igjen fullt forståeleg at det blei sånn, seier ho.

Måndag kan dei endeleg ynskja kundar tilbake til den nyoppussa salongen deira i Bogsnesvegen. Korleis det blir i praksis, veit dei ikkje endå.

– Vi gler oss til å opna igjen, og merkar at det er mange som ynskjer seg ein frisørtime. Så no handlar det om å få hjelpt flest mogleg på den tida vi får. Men fyrst vil vi prioritera dei 360 som har fått timen sin avbestilt i denne perioden vi har hatt stengt, seier Ann Kristin.

 

Skrekkblanda fryd

Det er knyt stor spenning til kva retningslinjer helsemyndigheitene legg på frisørnæringa før opninga. Kor mange tilsette kan vera på jobb på likt, kor mange kundar kan ein ha inne i salongen på same tid og kor mykje vasking blir det etter kvar kunde? Det er berre nokon av spørsmåla dei no venta svar på. Svaret får dei tidlegast torsdag.

– Om det vert avgrensa kor mange vi kan ha på jobb så kan det bli tungt. Det same gjeld kor mykje dødtid som går med til vasking og desinfisering mellom kundane. Og kor kostbart blir det å kjøpa inn det smittevernutstyret vi treng. Det blir spanande å sjå, seier Musland og legg til:

– Det er skrekkblanda fryd, vi vil ikkje vera ei kjelde til smittespreiing. Hovudprioriteringa vår er helse og sikkerheit, så vi kjem til å følgja dei retningslinjene vi får til punkt og prikke. Så får vi håpa at det ikkje betyr at vi må jobba med nevane på ryggen. Uansett så er vi veldig klare til å bretta opp ermane og gler oss stort til å koma tilbake på jobb, seier Musland.

Frisørfirlingen er også klare på at kundar med forkjølingssymptom må halda seg heime, og bed om forståing for det.

– Førebels er det heller ikkje mogleg å nytta ledigtime.no for bestilling av timar før vi har fått hjelpt dei som har mista timane sine. Vi håpar òg at folk kan ta kontakt via telefon om dei lurer på noko, seier Nina Medhus.