For ei avslutning på skuleåret!

Elevane på Hatlestrand skule har hatt ei usedvanleg spennande og lærerik avslutningsveke før sommarferien.

Frå måndag til torsdag har ikkje vanleg klasseromsundervisning stått på programmet på Hatlestrand skule. I staden har alle elevane, frå 1. til 10. trinnet, vore med på ei tverrfagleg temaveke, som har bydd på spennande aktivitetar både inne og ute.

Elevane vart fordelte på åtte grupper, som turnerte mellom ulike postar. Desse postane hadde overskrifter som forsøk med vatn, livet i fjæra, «Land Art», fiske frå land, garnfiske, livberging i sjø, og veggavis. Lurer du på kva «Land Art» er, så kan vi avsløra at det dreia seg om å fotografera augneblinkskunst som ein sjølv laga av ting ein fann i fjæra. Desse bileta vert så presenterte i veggavisa.

– Temaveka femner utruleg mykje. Noko av det viktigaste er at elevane får praktisk kunnskap, til dømes om emne som dei til vanleg berre les om, men ikkje prøver i forsøk. Ikkje minst får dei livsviktig kunnskap om livredning i sjøen, for vi har jo fjorden rundt oss, fortalde rektor Lilli Britt Urheim.

Dei gruppene som på det tidspunktet hadde delteke på garnfiske, hadde ikkje berre lært seg korrekt oppførsel i båt; dei kunne i tillegg gle seg over gode fangstar.

– Dei har fått nokre svære krabbar, lyr og ei skate, smilte Urheim, som samstundes nytta høvet til å takka lærarane som sette garna på kveldstid.

Ikkje bein i fileten

Rektoren hadde sydd saman eit variert program for Grenda sin utsendte. Besøket starta med eit besøk i idrettshallen, der lærarane Ragni Hestad og Arnt Ove Femsteinevik underviste i livredning. Elevane fekk prøva både hjarte- og lungeredning og å kasta livline.

– Veit dåke kva panikk er for noko? spurde Arnt Ove nokre gutar.

Svara var ikkje heilt presise, så læraren måtte forklara at det er noko som kan skje viss folk dett i sjøen. For å unngå panikk, er det viktig at dei som er igjen i båten kan kasta livline. David Jakobsen var fyrst i elden.

– Perfekt, var læraren sin dom etter kastet.

Medan gjengen trena vidare, stakk journalisten innom skulekjøkenet. Der var ei gruppe i gang med å laga fiskekaker av gårsdagens garnfangst. For etter å ha vore med på garnfiske-posten, gjekk elevane inn på skulekjøkenet for å filetera fisken, reinska kjøtet for bein, og til slutt laga saftige fiskekaker.

– Eg forsikrar meg om at det ikkje er bein her, opplyste Håkon Yndestad som studerte kvar einaste filetbit.

– Er det vanskeleg?

– Dette hadde vore det, om det ikkje hadde vore for det som skjer der borte, sa Håkon og peika på Eirik Gjuvsland Skjelnes som openbert gjort ein strålande jobb med å skjera opp filetane.

Flytande gulrøter

I naborommet fann vi posten «forsøk i vatn». Akkurat då bladfyken stakk innom, gjekk forsøket ut på å sjekka om ei gulrot hadde forskjellig flyteevne i ferskvatn og saltvatn.

– Kan vi prøva med ei potet? undra ein nysgjerrig gut.

Nett då banka Arnt Ove Femsteinevik på døra, og var klar for høgdepunktet under heile veka; livredning i sjøen. Vi gjekk ned i båthamna og borda ein båt. Arnt Ove sette kurs forbi Tongjen, der vi såg gjengen i «fiske frå land» i aksjon. Straks etter kom vi til stranda som ifølgje lokalkjende heiter Selbustaden. Der er eine inntaket til BKK si sjøleidning, men det ser ein ikkje mange spor av. Derimot dukka ei nydeleg sandstrand opp.

– Den er det BKK som har laga. Dei har rydda kjempeflott opp etter seg, roste Femsteinevik.

Alle elevane stilte no i våtdrakter, men om det var kaldt eller varmt i vatnet, var det svært ulike meiningar om.

– Det er iskaldt, sukka Tobias Eikeland.

– Nydeleg badetemperatur, kontra Gitle Femsteinevik.

Læraren gav sine instruksjonar om neste øving.

– De skal hoppa ut av båten, og så må de koma oppi igjen, utan at båten kvelvar.

– Det er umogleg, meinte Iver Femsteinevik.

– Dei andre fekk det til, lokka Arnt Ove. Og straks etter lukkast også desse gutane, sjølv om det slett ikkje var enkelt. Men med godt samarbeid, så er det utruleg kva ein kan få til.

Stor takk

Vel attende på land, avslutta Grenda rundturen hjå dei unge kunstnarane og journalistane som laga veggavis.

– Avisa skal festast på vindauga og henga der i heile sommar, slik at alle som kjem og skal spela volleyball eller frisbeegolf, kan lesa. Dermed har det blitt meir alvor over arbeidet, analyserte lærar Runhild Hove Eide.

Det var tydeleg at både lærarar og elevar storkoste seg med temaveka. Og no kan dei også gle seg over ros frå Fau-leiar Olve Vangdal.

– Vi er veldig takknemlege for det tilbodet skulen har laga til. Vi vil retta ei stor takk til lærarane, som sikkert har gått utanfor komfortsona for å få i stand denne veka, opplyste han.