Adonis-løysingar på franske luksusskip

Verdsleiaren i luksusturar, og det einaste franskeigde cruiseselskapet, Ponant, valde nettopp Kvinnherad-bedrifta Adonis sine løysingar for personal- og lønssystem.

Ponant og mannskapsbyrået Uvea Marine Services (UMS) har ein raskt veksande flåte med cruiseskip som tilbyr luksusekspedisjonar. Ponant har for tida fem slike skip i drift, men trur på ein ekspansiv vekst – med mål om å ha ni fartøy i drift innan 2019.

 

Trong ny plattform

Adonis tilbyr maritime HR-løysingar på den globale marknaden. 2.januar vart det klart at Ponant vil ta i bruk Adonis sine løysingar i alle personal- og lønsoperasjonar.

– Kompleksiteten i dei globale operasjonane våre gjorde det naudsynt for oss å sjå etter ein ny plattform og teknologi for mannskapsagenten vår UMS. Ved å velja Adonis, er vi sikre på å gå inn i framtida saman med ein partner som forstår dei høge krava våre til fulle. Vi treng effektive, kostnadsreduserande system vi kan stola på, seier François Vielfaure, som har tittelen Executive Vice Président Marine Operations i det franske cruisselskapet.

 

Langtidspartnarar

– Å bli valt ut av Ponant, etter ein tøff evalueringsprosess, stadfestar at Adonis held fram med å møta behova i dagens arbeidsintensive, krevjande og sterkt konkurranseorienterte maritime marknad, seier Sigrid Kviteberg, som har tittelen Project Director i Adonis.

Ho seier vidare at både Ponant og Adonis har rykte for å vera innovatørar på kvar sine felt.

– Derfor er vi stolte over å ha bli valde ut som partnaren deira. Vi ser fram til å gjera den eksisterande flåten deira meir straumlineforma, og vi ser fram til eit produktivt, langtidspartnarskap for å støtta veksten og innovasjonen deira i åra som kjem, sluttar Kviteberg.