Frå lærar til leiar

Trude Sundsteigen (45) har jobba som lærar ved Husnes ungdomsskule i 20 år. Til hausten ventar nye utfordringar for den spreke læraren, då går ho nemleg over i ei leiarstilling ved skulen.

– Det blir noko heilt nytt for meg. Eg er jo vane med å vera lærar og har trivst veldig godt med det. Sjølv om eg gler meg til å ta fatt på dei utfordringane som ventar, så kjem eg nok til å sakna elevkontakten i klasserommet, seier Trude.

 

Framsnakka

45-åringen har dei siste 20 åra jobba som lærar ved Husnes ungdomsskule. Her har ho undervist i fag som norsk, KRLE, samfunnsfag, engelsk og litt gym. Men med to tiår med erfaring i bagasjen, følte ho at det var på tide å kasta seg ut i noko nytt.

– Eg har lenge vore blant dei unge på jobben her, men det er eg ikkje lenger. No er eg komen i ein alder der eg følte at det kanskje var på tide å prøva noko nytt. Og skulle eg gjera det, så var det no, seier Trude.

Ho var ein av i alt seks søkjarar til den utlyste stillinga som avdelingsleiar ved Husnes ungdomsskule. 1. august trer ho inn i si nye stilling, og går då frå å vera lærar til å bli ein av leiarane for lærarane.

– Det kan kanskje vera litt både òg når du plutseleg skal bli leiar på same arbeidsplass som du har vore i 20 år. Men eg trivst veldig godt her, og har så utruleg mange flinke og rause kollegaer. Vi jobbar saman for at eleven skal stå i fokus og er gode på å framsnakka kvarandre, seier ho og legg til:

– Eg håpar at eg med mi erfaring som lærar kan bli ein god leiar og støttespelar for kollegaene mine. Eg ynskjer å leggja gode planar og leggja godt til rette for lærarane her, sånn at dei kan bruka tida si på å vera lærarar.

 

Ser fram til ny jobb

Det siste året har Trude også vore hovudtillitsvalt i Utdanningsforbundet. Eit år som har gitt husnesingen eit nyttig innblikk i den organisatoriske delen av skulekvardagen i kommunen.

– Det har vore utfordrande å vera to plassar samtidig, i to så forskjellege verder. Samtidig har det vore bra å sjå korleis kommunen er organisert og korleis oppvekstsektoren arbeider. Det har vore veldig lærerikt, og eg trur eg tek med meg mykje positivt frå det året inn i den nye stillinga. Så det er absolutt eit år eg ikkje ville vore forutan, slår den nye avdelingsleiaren fast.

No gler ho seg til å gå laus på dei nye utfordringane som ventar 1. august.

– Eg har ein tendens til å lika meg der eg er. Så er det opptil meg sjølv å tilpassa meg omgjevnadane og finna ut kva eg kan få ut av dei ulike situasjonane som ventar. Eg gler meg til å byrja, og trur at det kjem til å gå bra, sluttar Trude.