Valestiftinga ber politikarane om å utsetja saka om Bjørkedalsdammen

I dag skal Plan-, teknikk og miljøutvalet behandla saka om Bjørkedalsdammen. No ber Valestiftinga om at saka skal utsetjast til tidleg 2022.

I dagens møte i Plan-, teknikk- og miljøutvalet kjem det opp sak om kva som skal skje med Bjørkedalsdammen på Valen. Innstillinga frå kommunedirektøren er tydeleg;

1. Bjørkedalsdammen vert riven, jamfør tiltak 3 i forprosjektet frå Norconsult. Tiltaket treng ikkje konsesjon frå NVE.

2. Vassdraget vert ført tilbake til sin naturlege tilstand så godt dette lar seg gjera. Mesteprarten av dam-materialet vert deponert der magasinert ligg i dag, og tilsådd. Synleg røyrgate vert fjerna.

3. Tiltaket vert finansiert over investeringsmidlar i 2022, på sjølvkostområdet for vassforsyning.

Kulturminne

Valestiftinga på si side jobbar for å bevara dammen som eit kulturminne på Valen. Og ber no om å få saka utsett til tidleg neste år.

– Vi har sendt inn Bjørkedalsdammen i lag med den eldste kraftstasjonen på Valen som innspel til kommunedelplan for kulturminne. Denne jobbar kommunen med no. Demningen er eit viktig kulturminne som alle dei som ferdast i dette flotte turområdet vil at vi skal ta vare på, skriv Knut Rune Fatland på vegne av Valestiftinga i ein e-post til Kvinnherad kommune tysdag.

Tidleg i 2022

Dei jobbar også med å laga ei kulturløype på Valen, der blant anna kraftstasjonen og demningen spelar ei viktig rolle.

– Valestiftinga har tilsynsansvar for den gamle kraftstasjonen, det meiner vi kan vera eit alternativ for Bjørkedalsdammen også. Vi ber med dette om at saka vert utsett til tidleg 2022, så vi får moglegheit til å jobba fram ei god løysing for bevaring av demningen og samla inn nødvendige midlar til gjennomføring av tiltak. Innan den tid vil nok kommunen har kome langt med kommunedelplan for kulturminne, skriv Fatland.