1 av 4 båteigarar aksepterer fyllekøyring

Ei meiningsmåling gjennomført av Kantar på oppdrag for MA – Rusfri Trafikk viser at 23 prosent av båteigarane meiner det er greitt å køyra båt og drikka alkohol.

– Faktumet at heile 23 prosent ikkje ser problemet med å køyra båt med promille, er jo ganske skremmande, seier generalsekretær Elisabeth Fjellvang Kristoffersen i MA – Rusfri Trafikk i ei pressemelding.

Høg promille

Sommar og sol betyr også meir hygge til sjøs for båteigarar rundt om i landet. Fjellvang Kristoffersen og MA – Rusfri Trafikk fryktar at auka trafikk og båtfyll kan føra til alvorlege ulukker.

– Det gode vêret borgar for stor aktivitet på sjøen, noko eg sjølvsagt unner alle, men eg er redd nokon kan bli hardt skadd eller mista livet knytt til uheldige situasjonar med båtfyll, seier Kristoffersen og legg til:

– 20 personar mista livet på sjøen i fjor. Det er ein reduksjon på ni personar samanlikna med 2019. Det er svært gledeleg, spesielt sett i samanheng med det auka salet av fritidsbåtar. Men halvparten av dei som gjekk tapt var ruspåverka. Seks av desse var førarar av båten, og hadde til dels veldig høg promille, seier Kristoffersen.

Promille og risiko

Med dagens promillegrense til sjøs på 0,8, er ikkje Kristoffersen overraska over at mange av ulukkene oppstår i samband med promille.

– Promillegrensene legitimerer hardfyll på sjøen. Og med det kan resultatet bli fatalt, seier ho og peikar vidare på at svekka syn, tap av hukommelse, dårlegare reaksjonstid er nokon kjenneteikn på kroppens reaksjon med 0,8 i promille.

– Jo høgare promillen er, desto større er risikoen for at du gir blaffen i livreddande sikkerheitstiltak og overvurderer eigne evner. Det stadfestar også dødsstatistikken. Seks av dei ti omkomne med rus- og alkoholpåverknad brukte ikkje flytevest. Hamnar du først i vatnet med promille, blir kroppen raskare nedkjølt og overlevingstida vert halvert, seier Kristoffersen avslutningsvis i pressemeldinga.