– Håpar vi klarte å gje ein følelse av normalt liv i nokre timar

Det seier arrangør Trond Betten etter å ha arrangert Torgdagar på Husnes denne helga.

Etter over eit år med avlysingar, kunne Trond Betten og Omstock saman med fleire andre arrangørar endeleg ynskja kvinnheringane velkomne til festival i Husnes sentrum igjen.

Og med skyfri himmel og gode artistar på scenen, var ramma sett for to strålande dagar på torgplassen utanfor Husnes Storsenter.

– Då var den helga over. Det har gått med hundrevis av timar med arbeid, men det vart òg den beste festivalen vi har hatt. Alt gjekk på skinner og vi fekk betre vêr enn vi kunne drøyma om. Samtidig var det den mest krevjande jobben eg har hatt, seier Trond Betten.

Klapp på skuldra

For sjølv om landet gradvis opnar igjen etter strenge koronarestriksjonar, måtte arrangørane stabla på beina ein solid smittevennleg gjennomføringsplan for å få arrangementet godkjent. Dei hadde delt torgplassen i to «kohortar», og igjen delt publikum inn i faste kohortar på benkar med god avstand i begge sonene.

– Håpet er at vi, om berre litt, klarte å gje folk ein følelse av normalt liv i nokre timar, og at vi har gjort det på ein ansvarleg måte. Alle som var til stades kan klappa seg på skuldra og seia til seg sjølv at dei var veldig flinke. Utan det så hadde vi ikkje klart å gjennomføra på ein så god og trygg måte, seier Betten.