Alle sambanda vert forseinka

Ferjene i Hordaland skulle bli elektriske frå 1. januar. No viser det seg at ingen av dei fire sambanda i Kvinnherad vert klare til dess.

Det var NRK.no som søndag kveld kunne avsløra at totalt sju av dei 17 fylkesvegferjesambanda i Hordaland ligg etter skjema i elektrifiseringsprosessen. Spesielt vår kommune vil merka forseinkingane, for her er alle sambanda råka. Nye estimat viser at Utåker-Matre-Skånevik, Ranavik-Skjersholmane og Fjelbergruta vil gå over til elektrisk drift i løpet av fyrste kvartal 2020. For Gjermundshamn-Varaldsøy-Årsnes vil det ikkje skje før i tredje kvartal.

Forseinkingane kjem fram i eit notat prosjektleiar Rune Haugsdal har sendt til politikarane i Vestland fylke. Ifølgje notatet er hovudårsaka manglande ferdigstilling frå nettselskapa og manglande klargjering av ladestruktur. Det høyrer òg med til saka at på fem strekningar, deriblant alle fire i Kvinnherad, er dei nye eller ombygde ferjene rett og slett ikkje ferdige. Ein reknar med at alle fartøya skal vera klare i februar neste år.

 

Brann

NRK.no opplyser at meirkostnaden med å nytta elektrisk drift er i 2020 rekna til 241 millionar kroner. Investeringane i kaianlegg og ladestasjonar utgjer 600 millionar. Til nettstaden opplyser Skyss-direktør Målfrid Vik Sønstabø at operatørane har ein kontraktfesta overgangsperiode på seks månader der det er lov å køyra utan eldrift.

Fredag 11. oktober tok det til å brenna i batterirommet til ferja «Ytterøyningen», som skal trafikkera Fjelbergruta. Det er førebels ikkje avklart når reparasjonen er ferdig, og det er såleis usikkert om det kan bli ei lengre forseinking på dette sambandet.