– Kjenner litt på at det har vore mykje arbeid som no vert lagt bort

– Eg kjenner litt på at det omfattande utgreiingsarbeidet om skulestrukturen no vert lagt bort utan at noko vert teke til følgje. Det seier kommunedirektør Ragnhild Bjerkvik etter debatten i formannskapet torsdag kveld.

Når no det meste tyder på at Sp, Høgre og Frp finn saman om å verna dei fleste skulane i Kvinnherad, medfører det eit vedtak som ligg langt unna kommunedirektøren si innstilling. Det betyr at administrasjonen, som har jobba intensivt med saka i halvtanna år, ikkje har fått gjennomslag. Ragnhild Bjerkvik verkar difor noko oppgitt når Grenda snakkar med ho fredag ettermiddag.

– Vi må jo forhalda oss til dei politiske vedtaka. Men det må også vera ei hensikt med å gje oss denne typen bestillingar. Det har blitt lagt ned eit formidabelt arbeid for å svara opp det vi oppfattar var bestillinga frå politikarane. Dessutan har det kome til ting undervegs som vi òg har måtta svara opp. I heile prosessen har vi hatt mange tangeringspunkt med politikarane, både i formannskapet og i ulike samtalar, så det har ikkje mangla på det, fortel ho.

Bekymra

Bjerkvik slår vidare fast at det heile tida har vore eit stort engasjement i saka på fleire nivå i den kommunale organisasjonen.

– Føler du at arbeidet nærast har vore bortkasta?

– Akkurat no kjenner eg litt på det. Det gjer meg trist, vedgår ho.

Når politikarane vil behalda dei fleste skulane, samstundes som ein opnar for nybygg/rehabilitering av Undarheim, er det klart at saka også har ei betydeleg økonomisk side.

– Klart at det er ei stor bekymring. Det utviklingsarbeidet vi heile tida held på med, vert no meir utfordrande, seier ho, og er like bekymra for moglegheitene til å skapa styringsdyktige einingar og til å rekruttera naudsynt kompetanse til skulane.

– No ligg det tre ulike forslag på bordet (frå Sp, Ap og Frp). Vi har ikkje fått tid til å finlesa dei enno, men vil nok uansett ikkje vurdera dei nærare før vi veit kva som vert utfallet i kommunestyret. Men alle tre vil krevja stor grad av økonomi, for vi får ikkje teke ned drifta slik vi må for å møta morgondagens utfordringar, analyserer Bjerkvik.

– Meiner du det rett og slett var eit dårleg vedtak som formannskapet gjorde, og som det ligg an til blir vedteke i kommunestyret?

– Det vil eg ikkje seia, det får vera dine ord.

Trur på samarbeid vidare

– Kan denne saka gå utover samarbeidet og tilliten mellom administrasjonen og politikarane?

– Den største utfordringa blir nok å oppretthalda motivasjonen til dei som har lagt ned så mykje arbeid i dette. Det skapar heller ikkje grobotn for gode prosessar når vi skal ta ned drifta på andre område, for det må vi, vi har ikkje noko val. Dei seier jo litt når vi veit at elevtalet vil gå ned med 286 elevar i grunnskulen i Kvinnherad dei neste sju åra, fortel Ragnhild Bjerkvik.

Nokon har sikkert lagt merke til at Bjerkvik har lyst huset sitt i Rosendal ut for sal. Men til Grenda understrekar ho at det er heilt udramatisk. Salet skuldast berre at ho og familien av fleire grunnar ikkje har fått brukt huset så mykje som tenkt.