Synne har skumle planar denne sesongen: – Skal bli meir kynisk føre mål

Etter ei rekordlang oppkøyring er Synne Eide Bjørnebøle (21) så klar for sesongstart som ein kan få blitt. Ho går inn i sesongen med eit mål om å bidra med fleire scoringar.

– Eg gler meg stort. Det har vore ei veldig lang og tung sesongoppkøyring. Vi har måtta vera på heile tida, for vi har ikkje visst kva tid sesongen skulle starta og kva tid ein måtte vera i toppform. Men no på søndag så startar endeleg alvoret, seier Bjørnebøle.

Opnar mot Hønefoss

Søndag brakar det laus i 1. divisjon. For Åsane sin del betyr det bortekamp mot Hønefoss på AKA Arena.

– Etter nesten eit halvt år utan ein teljande kamp så startar alvoret no på søndag. Endeleg! Vi gler oss stort til å koma i gang, seier 21-åringen frå Halsnøy.

Synne melde overgang frå Stord før førre sesong, og har med det éin full sesong med 1. divisjonsfotball i beltet. Frå sin høgrekantposisjon leverte ho mange målgjevande og fire scoringar. Denne sesongen håpar ho på fleire.

– Eg har heilt klart lyst å bidra med fleire mål. Eg hadde mange sjansar som eg burde ha sett i nettet fjor, men som eg slurva vekk. Difor har eg eit personleg mål om å bli meir kynisk føre kassen denne sesongen, seier ho.

Tøff motstand

I oppkøyringa har Åsane berre møtt motstand frå Toppserien. Kampar som har handla mykje om å forsvara seg og stå i mot eit høgt press frå betre motstandarar. Det aukar spenninga før helgas sesongstart.

– Sidan vi berre har møtt lag frå Toppserien, så har vi spelt ein del kampar som har vore litt annleis enn dei hadde vore om vi hadde møtt lag frå 1. divisjon. Sånn som mot Sandviken på laurdag, så var det einvegskøyring heile tida, og det handla berre om å forsvara seg. Det har vore veldig kjekt å møta så god motstand, men det betyr òg at det er vanskeleg å seia korleis vi er i forhold til andre lag i divisjonen vår. Det blir spennande å sjå, men eg føler heilt klart at vi er betre enn i fjor, slår Synne fast.

Fotballen viktig i koronaen

På sida av fotballen studerer 21-åringen økonomi og administrasjon på Høgskulen på Vestlandet. Ei studietid som det siste året har vore veldig sterkt prega av heimeskule. Difor er ho glad ho har hatt fotballen å gå til.

– Sjølv om det har vore vanskeleg med ei lang og tøff oppkøyring, så har det vore veldig fint å ha treninga å gå til i denne perioden. Vi er heldige som har fått lov til å trena, noko som har bidrege til å halda motivasjonen oppe heile tida. Med treningane så har vi hatt ein sosial arena på sida av all nedstenging, seier Synne.

Sesongen som no ventar vert viktig for Åsane. Klubben har som mål å gjera det betre enn fjorårets 5. plass, og veit at om dei får alt til å klaffa, så kan dei vera med å kjempa om opprykk. I tillegg til det skal dei avduka si nye leikegrind heime mot KIL/Hemne 26. juni.

– Dei jobbar no med å få ferdig Åsane Arena, som eg trur skal bli eit veldig bra anlegg for oss. Med ny stadion og forhåpentlegvis gode resultat, så håper eg at vi også kan dra litt folk på kampane våre. Eg gler meg i alle fall stort til å få kome skikkeleg i gang igjen, så er det viktig å få ein god start allereie no på søndag, seier Synne.