Giganttransport gjekk raskt og smertefritt

Totalt 417 tonn flytta seg frå kaien i Austrepollen til Mauranger transformatorstasjon utan problem.

 

Mauranger transformatorstasjon skal få to nye transformatorar. Den fyrste kom sjøvegen til Hellesøy verft på Løfallstrand tysdag kveld, før transporten gjekk vidare til Austrepollen torsdag morgon. Der venta to trailerar som tok seg av frakta vidare til endestasjonen eit par kilometer unna.

Transformatoren er bygd i Nijmegen i Nederland, og vart transportert på lekter til Rotterdam. Der henta Statnett transformatoren og flytta den på båt til Mauranger. Transformatoren åleine veg 215 tonn. Inkludert to trailerar og hengar vart totalvekta 417 tonn.

Vegen vart stengt cirka klokka 9.45. Berre omlag 20 minuttar seinare var følgjet framme ved transformatorstasjonen, og vegen kunne opnast att. Den krappe svingen ved brua i Austrepollen var på førehand rekna som eit kritisk punkt, men bilane hadde ingen problem og kunne køyra gjennom med god fart.

– Vi er kjempenøgde, slo Leif Gunnar Miljeteig, seksjonsleiar for driftsområde Hordaland i Statnett, då alt var i boks.