Kvalitet - er det verkeleg storleiken det kjem an på?

Skuleforskar Thomas Nordahl finn at skulestorleik ikkje er avgjerande for kvaliteten, men at skuleeigar si satsing og pedagogiske leiing har større konsekvensar. Det er korleis du nyttar dei ressursane du har som tel. Samfunnet er i stadig endring, og noko av utviklinga kan me styra. Andre ting rår me ikkje over. Det er ikkje eit mål at alle skal vere like eller ha det likt, men ein god oppvekst treng alle. FAU krev satsing og prioritering framover; og peikar på faktorar som Kvinnherad kommune kan gjera noko med i kraft av å vere skuleeigar med det overordna (pedagogiske) ansvaret for innbyggjarane.

Korleis har oppvekststrukturen endra seg siste tiåra på øyane?

Barnehagane har gått frå fire kommunale til ein privat. Tidlegare Brekke, Hauge, Sæbøvik og Sætre barnehagar er avvikla. Private aktørar har ikkje «kuppa» barnehagedrifta på Halsnøy/Fjelberg; dette har kommunen sjølv lagt opp til og er difor tydelegvis ønska utvikling frå kommunalt hald. Då vert det merkeleg å gje avslag på tiltrengt ekstra avdeling på opptil 25 barn grunna ledige kommunale barnehageplassar på fastlandet. Kommunen har sjølv lagt ned fire kommunale barnehagar på øyane. Det er verd å merka seg at ved ei utviding på opptil 25 barn i Espira, vil kommunen berre måtta forplikta seg til å gje tilskot til det faktiske talet på barn i avdelinga. Situasjonen påfører nybakte foreldre unødig uro i ei sårbar tid av livet. Slik vil me ikkje ha det! FAU krev at kommunen gjev Espira rammer for å tilby nok barnehageplassar.

Barneskulane er redusert frå fem til èin. Fatland, Brekke, Hauge, Tofte og Sætre skular er historie, og Halsnøy skule feirar ti års jubileum i år. Skulen er ny og passeleg stor med elevtal på160-190 barn. Ei stor ulempe med felles skule i eine enden av øya, er at mange barn må sitje på skulebussen med støy og uro i opptil 45 minutt.

FAU ønsker å bevara Øyatun ungdomsskule. I 2/3 forslag til skulestruktur skal Øyatun leggjast ned og 100 % av elevane skyssast i buss for skulekvardag eit nærmiljø der dei fleste manglar tilhørighet. Slik situasjonen er i dag, fryktar me dårlegare tilgang på ressursar og rom (døme: symjeopplæring), og svekking av positivt samarbeidet med lokalmiljøet. Det beste er å la Øyatun bestå. Me ønsker å heller sjølv sei ifrå dersom tida er inne for å flytte barna våre til Husnes ungdomsskule grunna uforsvarleg lågt elevtal på Øyatun. Kvinnherad kommune refererer til nærskuleprinsippet:

«Hensikten med nærskoleprinsippet er blant annet å gi barna anledning til å skape eller fastholde holdepunkter i nærmiljøet, Et slikt holdepunkt er skolen. Det er derfor viktig at barna har en rett til å gå på skole i det som er deres naturlige nærmiljø., jf. NOU 1995:18 punkt 20.4.4.2.»

Husnes er per dags dato ikkje elevane i Halsnøy krins sitt naturlege nærmiljø. Øyatun knyter undervisninga til nærmiljøet for å styrka kvaliteten i undervisninga, gje variasjon for elevane, og på lang sikt styrker dette lokal identitet og tilhøyrsle. I ungdomsskulealderen aukar engasjementet og mange unge ønsker å bidra og ta ansvar. Øyatun har mange dyktige, drivande ungdomar som er gode på praktisk arbeid. Elevrådet samarbeider tett med sosiallærar om å arrangere kjekke aktivitetar både i og utanfor skuletida, noko som styrkar trivselen. Elevane vågar å bidra i fellesskapet fordi dei er vane med valfagsundervisning på tvers av klassetrinna, noko som skapar samhald og tryggleik på tvers av klassane.

FAU er uroa for at flytting til Husnes ungdomsskule vil påverke samarbeidet mellom heim – skule og mellom heim- heim. Relasjonen mellom foreldra i gruppa påverkar oppvekstmiljøet, og det er konstruktivt med samarbeid om innetid, skjermtid, overnattingsturar osb. i foreldregruppa. Samarbeid føreset relasjonar og kjennskap til kvarandre, noko som i høgste grad også gjeld samarbeid med læraren. Me fryktar høgare terskel for å ta kontakt med Husnes ungdomsskule av den grunn. Foreldre vil i større grad vere avhengig av sertifikat/bil for å delta på møter. Me får meir køyring for å hente barn på skulen eller hos venner på Husnes, då det er ulovleg å sykle gjennom tunellen. FAU opplever positive, engasjerte foreldregrupper som stiller opp for barna, og det har så stor verdi at me tek ikkje sjansen på å forringe samarbeidet ved å leggje ned Øyatun.

Nei til heildagsskule – ja til valfridom og auka kvalitet i skuledagen.

Erfaringane etter Rosendalsprosjektet viser praktiske utfordringar med gjennomføring av fritidsaktivitetane i skuletida; dette ikkje er gjennomførbart i praksis. Svak kommuneøkonomi står fram som hovudårsak til nedlegging av skular/barnehagar. Kva vil ikkje ein heildagsskule koste kommunen, der det skal serverast sunn mat kvar dag, barna skal få leksehjelparar som er betre kvalifiserte enn foreldra (altså pedagogisk personale?) og fritidsaktivitetar innbakt og gratis for alle barn.

Økonomisk sett er det heilt bak mål å foreslå noko slikt, og samstundes arbeida for å legge ned flest mogleg einingar grunna høge driftskostnadar. Kommunen treng ikkje utvida timetalet for å styrka tilbodet; det trengs ikkje heildagsskule for å servere gratis frukt kvar dag til elevane! Lag klassevise felleslunsjar ein dag eller to i veka, server frukt kvar dag! Organiser leksehjelpa i mindre, faste grupper med ein leksehjelpar per gruppe. Innfør meir praktisk-estetiske aktivitetar i skulekvardagen, slik at barna får danning av heile mennesket med meir song, dans, maling, klatring, hopping, fisking og leik ute og inne.

Skulekvardagen treng betre kvalitet og meir variasjon for at elevane skal orke å vere der heile dagen. Difor ber me kommunen om å først styrkja SFO-tilbodet/leksehjelpa og satsa meir på praktisk-estetiske fag i skulen. Skrinlegg dei urealistiske og dyre planane om heildagsskule! Tilby gratis SFO til alle som ønsker å nytte seg av tilbodet, uavhengig av familien sin økonomisk situasjon for å sikra likeverdige tilbod. Familiane sin valfridom må vernast!

Deltaking i SFO-ordninga går ned i takt med aukande alder: Jo eldre barna blir, jo færre deltar i SFO (1.trinn 82%, berre 31 % på 4. trinn). Sluttar barna på SFO berre fordi foreldra vil spara pengar eller ligg andre grunnar bak? Ikkje alle menneske trivst i «flokk»; introverte barn treng ro etter aktive skuledagar. FAU oppmodar Kvinnherad om ikkje la ideologi eller økonomi bestemma oppvekstkåra til barna våre – la barnets beste få bestemme. FAU fryktar at engasjementet/dugnadsånda og valfridomen hos foreldra vil svekkast ved innføring av heildagsskule slik kommunen skisserer organiseringa av denne.

I eit 15 siders innspel i høyringsrunden fortel FAU kva me treng for å sikra framtidige generasjonar ein god oppvekst på øyane. Kvaliteten er viktigare enn storleiken. Me arbeider vidare med trivsel og utvikling i lokalmiljøa, og håpar at Kvinnherad kommune heiar oss framover!

Me har følgjande forventningar til Kvinnherad kommune:

• Kvinnherad kommune (skuleeigar) må ta større ansvar for å auka kvaliteten i grunnskulen. Styrka delingskulturen og leggja tydelegare føringar til drifta med fokus på god klasseleiing, positivt arbeids- og læringsmiljø, motiverande leiarar/mellomleiarar, og auka satsing på praktisk-estetiske fag.

• Styrkjer Øyatun ungdomsskule. Legg gjerne til rette for at også elevar frå andre skulekrinsar kan få eit variert, aktivt og inkluderande læringsmiljø på Øyatun.

• Gjev tilskot til Espira barnehagen, slik at alle barn får barnehageplass i eige nærmiljø

• Legg bort vyane om heildagsskule, men tilbyr gratis SFO til alle som ønsker det, samt styrkar leksehjelpa ved å organisere i mindre, faste grupper med fleire vaksne leksehjelparar, eventuelt eldre barn/ungdomar

• Jobbar med tryggare skuleveg med fleire busslommer og meir gang/sykkelveg

• Går i reell dialog med foreldre ved å spørje kva dei treng for å gje barna gode oppvekstvilkår og ta innspela dei kjem med seriøst. Anerkjenner det gode arbeidet som elevar, tilsette, foreldre og besteforeldre gjer i oppvekstmiljøet, både på fritida og i skule- og barnehagekvardagen. Jobbar med kommunikasjonen i organisasjonen sin (jfr den respektlause, stigmatiserande og useriøse teiknefilmen om oppvekst).

FAU Halsnøy skule

FAU Øyatun ungdomsskule