Rosendal får bygdelag

Driftige eldsjeler har gått saman om å starta Rosendal Bygdalag. Måndag 26. august er det stiftingsmøte i Rosendal Samfunnshus.

 

– Det er på høg tid at bygdefolket i Rosendal får eit felles talerøyr og ein arbeidsbenk til å fremja gode forslag, oppgåver og trivsel. Vi gler oss over at dugnadsviljen er stor, som tidlegare i sommar då gode krefter samla seg for å få styr på eit forvilla rosebed, skriv Solfrid Hellesøy Siqveland i ei pressemelding.

Siqveland har, saman med Marianne Helvik, Anne Sigrid Totland og Karin Thauland, teke initiativ for å oppretta bygdelaget i Rosendal.

 

Samhald og samarbeid

Under stiftingsmøtet 26. august skal det fattast vedtekter, styre skal veljast og ein skal finna dato for første årsmøte i februar 2020.

– Høve for samtale og kaffidrøs må vi sjølvsagt også ha. Alle sakspapir vert tilgjengeleg på Facebook og til gjennomlesing på Rådhuset frå 12. august. Vedtektene som er foreslått tek utgangspunkt i andre grende- og bygdelag sine vedtekter, og skal vera nokså greitt å få orden på. Samanfatta kan vi seia at Rosendal Bygdalag skal vera for alle med fast bustad med postnummer 5470, seier Siqveland.

Føremålet er å skapa eit lag som skal styrka samhald og samarbeid i bygda for å fremja ei positiv utvikling. Førebels medlemspris er foreslått til å liggja på 50 kroner for alle over 15 år.

– Laget kan ha ansvar for tilstellingar og aktivitetar, vera kontaktorgan, og ta opp til drøfting saker av felles eller lokal interesse. Vi håpar så mange som mogleg kan vera medlemmar. Styret skal bestå av fem personar, og kan oppretta nemnder og grupper for arbeid med særskilte saker. Vi ynskjer alle velkomen til stiftingsmøte, sluttar Siqveland.