Stor oppleving på Slottet

Ove Tvedt og Kaare Skaala var tysdag på Slottet for å helsa på kongeparet. Som ein ekstra bonus fekk heidersmennene sitja til bords med Dronning Sonja i halvannan time.

Høvesvis den 2. og 12. mars fekk Kaare Skaala frå Rosendal og Ove Tvedt frå Valen utdelt Kongens fortenestemedalje. Alle slike mottakarar vert også inviterte til Oslo for å helsa på kongeparet, og denne veka var 21 slike heidersfolk på Slottet.

– Viss eg skal vera ærleg, og det skal ein jo helst vera, så var det ei heilt utruleg oppleving, seier Kaare Skaala om det han opplevde saman med kona Kirsten.

Etter ei omvising på Slottet, vart gjestene oppmarsjerte på rekke, og ropt inn eitt par om gangen til den store ballsalen, der kongeparet stod og venta. Medaljørane gjekk inn i alfabetisk rekkefølgje; Kaare og Kirsten Skaala som nummer 19 og Ove og Grete Tvedt heilt til slutt. Det var ikkje høve til anna enn å handhelsa på kongen og dronninga, før para bevega seg vidare til der dei skulle sitja under serveringa.

 

Opne hytter

Dei fire kvinnheringane hamna på sida av kvarandre ved same bordet. Der sat også Tor Erik Gunstrøm, komikar og trommeslagar i Dizzie Tunes med følgje, samt eit par frå Nordfjord. I tillegg var det ein ledig stol ved det vetle bordet.

– Vi lurte fælt på kven som skulle sitja der, og trur du ikkje det var Dronninga sjølv. Så vi fekk halvannan time saman med ho. Dronninga var veldig interessert i Kvinnherad, og kjende sjølvsagt godt til kommunen vår. Kanskje var det derfor ho hamna ved dette bordet? seier Kaare, som kan opplysa at Dronning Sonja stilte han ei rekkje spørsmål om Rosendal og naturen der.

– Vi var inne på mange ting. Det var utruleg interessant, det må eg seia, slår Kaare fast.

Ove Tvedt snakka sjølvsagt om Postvegen og hyttene han og Interesselaget for Vardhaugselet har sett opp.

– Det var veldig hyggeleg og stor stas å sitja attmed henne. Alle dei om lag ti borda hadde éin tilsett ved slottet med seg, men vi hadde sjefen sjølv, ler han.

– Eg fekk sagt litt om kva eg har bala med opp gjennom åra. At vi har som politikk at alle hyttene våre skal stå opne, tykte ho var flott, seier Ove.

Forventningane

Han let seg dessutan imponera over Dronning Sonja sine lokalkunnskapar om Kvinnherad.

– Ho spurde mellom anna om korleis det går med løa til Baroniet. Det var elles veldig kjekt å dela bord med Kaare. At to kvinnheringar var på same mottaking, er spesielt. Eg trur ikkje nokon andre kommunar hadde to medaljemottakarar denne gongen, fortel Ove Tvedt.

– Svarte turen til forventningane?

– Absolutt, det var faktisk mykje betre enn forventningane, vurderer valebuen.

Under matøkta sytte tre blåsarar frå Barratt Due musikkinstitutt for vakker musikalsk underhaldning.

– Det heile var veldig stilig, slår Kaare Skaala fast.