Bed om undersøkingar før riving

Fylkeskonservatoren meiner løa til Undarheim gard bør undersøkjast nærare før ho eventuelt vert riven.

 

I byrjinga av april søkte Prosjekt Konsult Kvinnherad AS, på vegner av Sør-Norge Aluminium (Hydro Husnes), om rammeløyve til å riva den gamle løa på Undarheim gard. I søknaden vart det vist til at bygninga er i dårleg forfatning og delvis til nedfalls.

– Søral har derfor sperra rundt med gjerde, då det kan vera til fare for uvedkomande som eventuelt går inn i området, skreiv søkjarane, og la til at ei trudde løa var bygd kring 1920.

Rammeløyve vart gitt i juni, men nokre dagar seinare tok Prosjekt Konsult ny kontakt med kommunen. Årsaka var nye opplysningar om at deler av løa kunne vera frå 1888 og tidlegare. Selskapet spurde difor om Riksantikvaren skulle koplast inn og om kommunen ville på synfaring.

– I samråd med Søral avventar vi vidare arbeid til dette er avklart, opplyste Knut M. Teigen hjå Prosjekt Konsult.

 

Brann opp

Saka vart sendt til fylkeskonservatoren til vurdering, og han har no sendt sitt svar. Han opplyser at gardshistoria på Undarheim kan førast langt tilbake i tid, men dagens bygningsmasse er frå 1800-talet, mellom anna våningshuset som skal vera frå 1825. Løa er det derimot usikkerheit kring.

– Det gamle fjøset, som hadde høyrt til skrivargarden, brann opp med buskap og avling i 1865. Nytt fjøs vart bygd opp igjen, truleg på same staden. Etter 1945 var det bygd om til ein moderne driftsbygning. Det er uklart kva som er igjen av eldre bygningselement, skriv konstituert fylkeskonservator David J. Aasen Sandved.

Han slår fast at Undarheim embetsgard er eit kulturminne av regional interesse, og rår til at løa vert undersøkt, registrert og vurdert med omsyn til alder og teknisk tilstand før vidare handsaming av rivingssøknaden. Denne undersøkinga kan både fylkeskonservatoren og Sunnhordland museum hjelpa til med.