– Skal vera eit bindeledd mellom kommune og politiet

Som ein del av den nye politireforma skal alle kommunar i landet no få sin eigen politikontakt. I Kvinnherad er det politibetjent Are Uppheim som har fått ansvaret.

Det vart klart på Kvinnherad lensmannskontor sin pressekonferanse onsdag morgon. Der dei orienterte om politikontakt-stillinga som alle av landets kommunar var pålagd å ha på plass innan 15. juni.

– Det er ein funksjon som blir permanent rundt om i heile landet, og hos oss er det Are som mellombels har fått ansvaret. Hovudoppgåva hans blir å vera eit bindeledd mellom kommunen og politiet i det førebyggjande arbeidet, seier lensmann Jan Fosse.

 

Struktur

Vidare fortalte Fosse at samarbeidet mellom kommunen og politiet har vore bra i lang tid, men at det no skal strukturerast betre og at Are Uppheim står for kontakten.

– Tidlegare har dette arbeidet vore spreidd på oss alle. No er det Are som kjem til å stå for kontakten, og så vil han delegera saka vidare til ein av oss andre om det trengst. Vi er veldig glade for at vi no får meir struktur rundt dette, seier politioverbetjent Sigurd Børve.

Døme på oppgåver Uppheim kjem til å møta i sitt nye arbeid kan vera der kommunen vil diskutera ei mobbesak på ein skule eller om dei treng råd og vink til skjenkeløyve.

– Men det gjeld også publikum. Det kan kanskje vera ei sak som publikum ikkje ynskjer å melda, men berre treng å drøfta med oss i politiet. Då kan dei ta kontakt med meg, seier Uppheim.

 

Positiv ordførar

Ordførar Peder Sjo Slettebø tek den nye ordninga i mot med opne armar.

–  Vi har frå før ein veldig god dialog med politiet. Men det å få det formalisert slik som dette trur eg er ei god ordning. Eg får stadig ulike spørsmål frå publikum som eg har behov for å drøfta med politiet, og med ein politikontakt på plass blir dialogen enno meir ryddigare enn før, seier Peder Sjo Slettebø.