– Vi held ope, men tek éin dag om gangen 

Når folk får beskjed om å halda seg heime, let også gjestene venta på seg hos Rosendal Fjordhotel.

Ny smittebølgje skapar utfordringar for fleire bransjar, kanskje særleg for hotell- og reiselivsbransjen.

– Det er ein veldig spesiell situasjon som vi no igjen har kome opp i. Vi veit lite om kva som vil skje og kor dette vil enda. Her tar vi éin dag om gangen, og håper i det lengste at vi kan slå ned dette slik at vi unngår ny nedstenging, seier hotellsjef Arne Havnerås ved Rosendal Fjordhotel.

Då koronapandemien slo innover landet i mars og landet i praksis stengte ned, måtte også Rosendal Fjordhotel stengja dørene. Men med stort fokus på norgesferie i sommar, strøymde gjestene til fjordhotellet i høgsesongen.

– Vi har hatt mange tusen menneske her, og har framleis ikkje hatt noko smitte. Slik håper og trur vi at det også vil vera i framtida. Det er og skal vera veldig trygt å besøkja oss, vi held oss til dei gitte smittevernreglane, held avstand og har god hygiene. Så her er det trygt for både tilsette og tilreisande, seier Havnerås og legg til:

– Det er berre gjestane vi manglar. Nett no er det veldig stille og roleg, men vi held ope. Kor lenge vi kan det, veit vi ikkje. Vi har ikkje peiling på kva som skjer i framtida, og tek éin dag om gangen, seier han.