Vøler gamle stølsvegar

Gamle stølsvegar rundt Guddal og Naterstad vert no rusta opp. Mykje av steinarbeidet er det Erling Guddal som utfører.

 

Over fleire år har Seimsfoss Grendalag gjennomført eit stort arbeid med å setja opp informasjonsskilt langs stiane i Guddal og Naterstad. No er dei i gang med neste fase; å rusta opp dei gamle stølsvegane i området.

– Vi ser på stiane frå Guddal og opp til Gamlestølen og vidare til Kuhammar, frå Guddal og innover mot Hilldalen, samt på Naterstad-sida, seier Leiv Guddal, leiar i Seimsfoss Grendalag.

Fyrste prosjekt er å vøla stien som går frå Guddal, forbi Hønshaug til Gamlestølen. Denne traseen er også populær for turgåarar som nyttar dei T-merka rutene til Malmangernuten og Skeisfjell. Arbeidet går fyrst og fremst ut på å retta på steinar i utvalde deler av løypa. Nokre trappetrinn i krevjande parti er det også kome.

– Det har vore eit mål å gjenskapa stien slik han var, då han var framkomeleg for storfe, opplyser Leiv Guddal.

 

Trongekleiv

Jobben vert gjort av Erling Guddal frå Naterstad. Det er freistande å kalla han for ein lokal sherpa, men det heidersteiknet vil han ikkje ta i mot.

– Eg er ingen sherpa, seier han.

Men andre synest han fortener ein slik karakteristikk, noko denne vesle historia viser.

– For nokre veker sidan møtte eg to turgåarar frå Stord som var på veg ned frå Gamlestølen. Før dei kom ned til meg høyrde eg dama seia: «Her har nok sherpaene vore». Eg snakka med dei rett etterpå, men sa ingenting om kven som hadde gjort arbeidet. Det var jo litt løye at dei ikkje ana noko om det, smiler Erling.

Eitt av partia han har putla med heiter Trongekleiv.

– Eg jobba littegrann der i vekene før ferien. Men det er eit vanskeleg område, for vatnet kjem fram rett oppom Trongekleiv og renn rett igjennom, fortel han.

– Er det råd å få vatnet vekk?

– Nei, det veit eg ikkje, det blir sikkert ganske omfattande.

 

Midtaskjen

Erling starta med stiprosjektet i fjor haust.

– Du byrja nedanfrå? undrar Leiv Guddal.

– Nei, eg såg noko lenger oppe ved Midtaskjen, så eg tok det fyrst, opplyser namnebror Erling.

Dugnadsarbeidet gjer han i ledige stunder, noko som sikkert kan vera utfordrande med tanke på at 62-åringen både er i full jobb hjå BKK og er småbrukar. Men no nærmar det seg fullføring.

– Det spørst kor nøye vi skal ta det. Men det går greitt slik det er no, vurderer Erling.

Prosjektet til Gamlestølen er ikkje det fyrste han gjev seg i kast med.

– Viss du går inn på Naterstad-sida vil du sjå fleire stader der det er gjort arbeid, med sitjeplassar, bord og benker. Det er det han som har utført, roser Leiv Guddal.

Kva som er neste prosjekt har ikkje Grendalaget teke stilling til enno.

– Eit av måla er å rusta opp stiane til Hilldalen, Seimshilldalen og Grøneviksvatnet, der den nye hytta ligg. Erling har vore der òg, seier Leiv.

– Det er no merka med vardar frå Hillsdalsvatnet til Helavatnet og hytta, stadfestar Erling.

 

Stølingsperioden

Gamlestølen var i bruk fram til 1942. Det var dei 6-7 bruka på garden Skeie som støla der. Budeiene overnatta i sela, men måtta slita seg opp og ned til stølen kvar einaste dag i stølingsperioden. Dette var også driftevegen for dei som skulle heilt til Seimshilldalen. Budeiene der inne budde permanent på setra om sommaren, men leverte mjølka nede ved Hillsdalsvatnet, der det vart henta.