Fatland vassverk: Fryktar rettstvist

Jostein Saghaug (MDG) fryktar saka om kommunal overtaking av Fatland vassverk kan enda med rettssak.

I staden for å spikra overtakingsdatoen til 1. januar, innstilte kommunedirektøren på å endra til «Kvinnherad kommune overtek Fatland Vassverk med sine aktiva og passiva så snart ny kommunal vassforsyning er kopla til leidningsnettet på Fatland og kan distribuerast ut til

abonnentane».

Jostein Saghaug reagerte på dette forslaget.

– Eg ser store problem med å vedta det nye punktet. Det har ein del juridiske problemstillingar. Eg har fått opplyst at kommunen har brote forhandlingane med grunneigar, utan å ha kome fram til nokon ting, sa han i kommunestyret førre torsdag.

Einingsleiar Egil Eide forklarte bakgrunnen for endringa.

– Kommunen hadde tenkt å overta 1. januar, men kom ikkje til semje med grunneigar om overvasskjelda. Han ynskjer ikkje å levera vatn til kommunen gratis, fordi han har andre planar for dette vatnet, sa han.

 

Vil unngå tvist

Saghaug ser ikkje bort frå at saka kan enda i rettsapparatet.

– Viss det oppstår rettstvist om dette vatnet, så kan det fort kosta 400-450.000 kroner. Er det slik at denne kostnaden vil bli fordelt på alle vassabonnentane i Kvinnherad? spurde han, noko Egil Eide stadfesta.

– Juristar har vurdert dette, og frå kommunen si side er det ingen grunn for ein tvist. Då må nokon eventuelt gå til søksmål mot kommunen. Ein gjer dette for å unngå ein tvist, understreka ordførar Hans Inge Myrvold.

Innstillinga vart dermed vedteke mot MDG sine to røyster.