Endå ein lang møtedag for politikarane

For andre gong på rad vert det skipa til både formannskapsmøte og kommunestyremøte same dag.

Torsdag skal politikarane samlast i Kulturhuset Husnes for ein lang dag. Fyrst skal formannskapet i elden. Saklista deira er ganske lang, og inneheld følgjande: Rullering av kommunedelplan for idrett og friluftsliv, underskotsgaranti Fjellhaugen Skisenter, sal av eigedom til Stiftinga Sunde kyst- og litteratursenter, busetjing av flyktningar i 2021, uttale kraftleidning Blåfalli-Sauda, anbod veg til nytt bustadfelt i Lonabrotet, uttale til endra utbyggingsplanar Onarheim kraftverk, eigedomsskattevedtekter, interkommunalt samarbeid mot akutt forureining, overordna beredskapsplan 2021-2024, nedsal frå kraftfondet med 90 millionar kroner, og ekstra sosialstønad i desember.

I kveldinga skal så heile kommunestyret i aksjon. Dei har berre éi sak på menyen, men det er til gjengjeld budsjett 2021 og økonomiplan 2021-2024.

Grunna koronarestriksjonane får korkje presse eller andre tilhøyrarar vera til stades, men møta vert kringkasta via kommunen si heimeside.