Avgjorde med dobbeltrøysta
Med tre mot tre røyster måtte søknaden om ein garasje med ei leilegheit oppå i avgjerast med utvalsleiaren si dobbeltrøyst.
Jan Helge Pile i Uskedalen søkte om oppføring av ein garasje med bueining og skisserte samstundes ein framtidig bustad der. Eigedomen er frå før bygd med fritidsbustad, og har eit total tomteareal på 3.049 m2.
Artikkelen held fram under annonsen.
«Storleiken på eigedomen gjer at det er krav til dispensasjon frå føresegn 3.1.2 i kommuneplanens arealdel, som krev plan for eigedom med plass til meir enn to bueiningar», vart det opplyst i sakspapira. Kommunedirektøren innstilte på å seia nei til søknaden om dispensasjon frå kravet om reguleringsplan. Guttorm Røssland (H) hadde eit anna syn på saka.
– Her på bygda, der vi stort set har nok areal å boltra oss på, må vi kunne gje dispensasjon. Noko anna vil vera heilt urimeleg, sa han.
Eit forslag om dispensasjon fekk støtte frå Røssland, Kai Morten Torget og Vegard Bjørnevik. Dei som derimot røysta for innstillinga var Clara Hveem, Øyvind Hardeland og Monica Lindseth. Sidan Marit Teigen var borte frå møtet og det ikkje hadde lukkast å få tak i vararepresentant, måtte Hveem avgjera saka med si dobbeltrøyst. Konklusjonen vart difor at det må lagast reguleringsplan.