Nedgang trass gratis tunnel

Jondalstunnelen vart gratis i sommar, men det hindrar ikkje ein betydeleg nedgang i trafikktalet. Det finst eit par openberre forklaringar på dette.

Den 10.050 meter lange tunnelen mellom Nordrepollen og Jondal vart opna for trafikk 7. september 2012. Etter prognosane skulle tunnelen blitt gratis i 2025, men i sommar vart regjeringa og Frp einige om at staten skulle dekka restgjelda på drygt 21 millionar kroner. Dermed vart bompengane fjerna 8. juli 2020.

Fjoråret starta med trafikkauke både i januar og februar, men så kom koronapandemien med full styrke. Deretter har kvar månad resultert i nedgang, med unnatak av juli – då heile Norge ferierte i heimlandet – og oktober. Under dei rådande omstenda kan det såleis ikkje seiast å vera overraskande at ÅDT-en (snittet per dag) viser ein nedgang på 43 køyretøy.

Det har nok også gjort betydeleg utslag at ferjekaiane i Jondal og Tørvikbygd på vårparten var stengt i periodar grunna opprusting.