Vil gjera Dill til eit dotterselskap av Kvinnherad Vekstbedrift

Posisjonen ynskjer å gjera Dill AS til eit dotterselskap av Kvinnherad Vekstbedrift.

Den såkalla «middagsaka» i Kvinnherad har skapt debatt etter at den var oppe til behandling i levekårsutvalet i januar. Torsdag skal den til endeleg behandling i kommunestyret. Til det møtet har Senterpartiet, Arbeidarpartiet og Sosialistisk Fellesliste fremja eit alternativt forslag.

– I det forslaget så seier vi i klar tekst at vi gir mandat til og bed Kvinnherad Vekstbedrift utgreia eigarskap av Dill AS som eit dotterselskap av Kvinnherad Vekstbedrift, seier ordførar Hans Inge Myrvold.

 

Vidarefører merkevara

Det vil skje med ein føresetnad om at Kvinnherad Vekstbedrift eig minimum 51 prosent av aksjane i Dill.

– Dill skal vidareførast som selskap og merkevare. Dill blir vidareført, men i ei grein under Kvinnherad Vekstbedrift. Så er det klart at dette skal forhandlast og utgreiast, og samstundes passa inn i ein framtidig struktur i Kvinnherad Vekstbedrift. Så det er ein del prosessar som skal på plass først, seier Myrvold.

Posisjonen bed om at endeleg utgreiing skal leggjast fram for formannskapet i april 2021. Ordføraren har trur på at dett

– Dette som går på matomsorg for eldre er sjølve grunnsteinen i Dill. Dei har over tid jobba og sveitta for å oppretthalda og utvikla det gode tilbodet dei har i dag. Vi meiner at vi kan forsterka matomsorga gjennom å byggja oppunder det som ligg i Dill-konseptet i dag. Og ved å slå saman desse kreftene meiner vi at vi kan styrka posisjonen for å driva Dill fram på ein god måte, seier Myrvold.

 

– Dette er ei gladsak

Styreleiar Per Ove Kviteberg i Dill AS er svært nøgd med forslaget som er lagt fram.

– Det er dette styret i Dill har kjempa for i lang tid. At kommunen må ta større ansvar for den viktige drifta som Dill ha. Og me har møtt ein fantastisk engasjert ordførar, som har stått på for å få fram eit forslag som eg trur alle involvert partar kjem til å samla seg om, seier Kviteberg.

Han meiner forslaget peikar i rett retning på fleire viktige punkt.

– Vi får sikra drifta i kjøkenet på Halsnøytunet, noko som har vore ein målsetnad sidan starten. Vi får oppretthalde Dill som merkenamn og omgrep. Dill har festa seg i Kvinnherad som eit nybrotstiltak innan eldreomsorg, med ein kombinasjon av frivilligheit og der ein bryter barrierar mellom det du kan kalla for den institusjonaliserte eldreomsorga og den eldreomsorga som skjer utanfor institusjonane. Noko som vert meir og meir nødvendig på grunn av den store auken i heimebuande eldre som treng meir oppfølging av mat, seier Kviteberg og legg til:

– Basert på dei signala som kjem frå kommunestyret så trur eg dette kjem til å bli veldig bra. Dette er ei gladsak, sluttar han.