Eit plastfritt Kvinnherad innan 2020?

Det var ei nærast rørande semje i formannskapet om å ta miljøutfordringane på alvor. Spesielt vil politikarane no plasten og kunstgrasbanane til livs.

Janne Hillersøy, plan- og kommunikasjonsansvarleg i SIM, møtte formannskapet på torsdag for å fortelja litt om selskapet sine planar. Ho opplyste at alle miljøstasjonane opplever trafikkvekst, og at selskapet vurderer å innføra kjeldesortering og innsamling av plast til neste år.

– Veldig bra at de vurderer å henta inn plast, roste Marit Årthun (KrF).

Ho spurde samstundes om SIM har planar om å tilby kjeldesortering for hyttekundar. Men Hillersøy svarte at deira erfaring er at dette fører til fleire problem enn nytte. Dessutan kan slike kundar uansett teikna vanleg abonnement, og dermed sortera som alle andre.

 

Fôra kvalar med plast

På formannskapsmøtet drøfta politikarane også den føreslegne ressurs- og miljøstrategien til SIM. Sjølve saka vart sendt rett vidare til kommunestyret, men debatten baud på fleire interessante innspel. Leif Sverre Enes (H) hadde registrert at «det er veldig i skotet for tida med kasting av mat og å fôra kvalane med plast». Han meiner Kvinnherad burde vore ein føregangskommune når det gjeld å ikkje kasta mat og plast, og viste til at det i Frankrike er forbode for matvarekjedane å dumpa useld mat.

Enes tok også for seg kunstgrasbanane, som er rekna som miljøverstingar.

– Kunstgrasbanane er fulle av plast, men no finst det alternativ. Det er på høg tid at vi reduserer dette, sa han.

 

Sjøfuglar

Marit Årthun likte svært godt det ho fekk høyra, og oppmoda kommunen til å syta for eller bidra til rydding i fjærene rundt omkring. Gretha Rød (Ap) fortalde om undersøkingar som avslører at heile ni av ti sjøfuglar har ete plast.

– Det er heilt enorme mengder det er snakk om. I Italia finst det einskilde byar der det ikkje finst plast, så kanskje Kvinnherad kan verta plastfritt innan 2020? lanserte ho, og haust anerkjennande nikk rundt bordet.