Fagutdanning skiftar namn

Ei av dei breiaste fagutdanningane Kvinnherad vidaregåande skule tilbyr skiftar namn til neste skuleår.

Frå hausten 2020 kjem det ny læreplan for både grunnskule og vidaregåande. I samband med fagfornyinga som skal stå klar til august 2020, skal linja som i dag heiter service og samferdsle endra namn til sal, service og reiseliv.

– Sal, service og reiseliv er eit meir dekkande namn på linja, for ho famnar breitt. Innanfor denne kjem mellom anna økonomi og administrasjon, reiseliv, vektar, logistikk, resepsjonist og salsmedarbeidar, ramsar Julie Holmedal Askeland opp.

Ho er fagteamleiar for linja og snakkar varmt om mogelegheitene som linja gir.

– Me har mange spennande fag. Kvinnherad kommune har til dømes eit veldig potensial innanfor reiseliv, med mange mogelegheiter. Det er viktig med lokal kunnskap og kompetanse både innanfor det feltet og til dømes handel. Og eg syns det er viktig å halda ungdommane våre lokalt så lenge som mogeleg, seier Holmedal Askeland.

Elevane har akkurat vore gjennom ein praksisperiode no. Yrkesfagleg fordjuping, som det blir kalla, er eit eige fag som dei får eigen karakter i.

– Læreplanen blir frå neste haust bygt opp litt annleis enn no, og me som lærarar står litt friare til å setja vårt stempel på undervisinga. Det vert litt endring i innhaldet vårt, og me kan gå meir i djupna enn breidda. Det blir òg litt meir fokus på reiseliv. Det som er sikkert er at søknadsfristen er 1. mars, sluttar fagteamleiaren.

 

Bil og bønder

Atta Salarzari har hatt fire veker praksis ved Fylkesnes Bil på Stord.

– Det har vore veldig gøy og lærerikt. Eg har fått gjort mykje forskjellige oppgåver. Det er jo kjekt å få vera i praksis, og ikkje berre sitja på på skulen, seier Atta som også går andre året på sal, service og sikkerheit ved Kvinnherad vidaregåande skule.

Då han gjekk i første året på linja var han i praksis hos Dimmelsvik Bil to gonger. Denne gonen har han altså pendla mellom husværet på Husnes og Stord for å vera tett på bil.

– Eg er interessert i bilar, og ei linje for kjøp og sal passar meg godt. Eg ynskjer å fortsetja innan dette feltet, men har ikkje heilt bestemt meg for korleis eg vil gjera det. Enten blir det ein god lærlingplass eller påbygg og meir utdanning etterpå, seier Atta.

May Beate Brakstad har vore i praksis på FK Butikken i Sandvikjo.

– Det har vore både spennande og lærerik å vera her, seier ho når Grenda stikk innom butikklokalet.

– Det er gøy å vera her, og eg får eit nytt syn på korleis kvardagen i ein slik forretning er. Å vera her fire veker i strekk gir noko anna enn å vera på same dagen over mange fleire veker, for no får eg oppleva korleis dei ulike dagane fortoner seg, seier Brakstad.

Første året på linja hadde ho praksis hos Pizzabakaren på Husnes og Sport1 i Rosendal. Ønsket var eigentleg å få praksis hos politiet, men det let seg ikkje gjera.

– Eg reknar med at det blir påbyggingsår for meg, slik at eg får studiekompetanse. Eg drøymer om å bli politi, så eg må bu meg på å lesa og trena for å nå det målet, fortel ho.

Hos Felleskjøpet har har Brakstad hatt Stein Olav Ølvestveit som sjef.

– Det gjer seg at dei får ei slik lang periode i praksisen. Då får dei oppleva at ikkje alle dagar er like, korkje i rytme eller arbeidsmengd. Og så er det kjekt å ha positiv ungdom med oss, smiler butikksjefen.