Arbeidet held fram, men litt forseinka

– Det går ganske bra, seier byggjeleiar Terje Nesse om oppføringa av ny bru over Furebergfossen. Men bilistane må venta endå litt før dei kan køyra nyevegen.

Sjølv no under koronapandemien pågår arbeidet på Fureberg bru for fullt.

– Det er folk på anlegget og arbeidet går som det skal. Einaste endringa er at dei tilsette ikkje et saman og må halda avstand, og elles følgja dei restriksjonane som gjeld, opplyser Terje Nesse i Statens vegvesen.

Akkurat no vert det jobba med plastring og steinsetjing under brua. På vestsida, altså mot Ænes, er ein godt i gang med å byggja mur. På austsida er ein byrja på fundamentet under muren som skal koma der.

Då Grenda skreiv om framdrifta i slutten av januar, varsla Terje Nesse at brua ville bli opna for trafikk allereie i slutten av april. Men slik vert det ikkje.

– Nei, det tidspunktet måtte vi skyva litt på. No snakkar vi heller om slutten av mai. Men ferdigstillingsdatoen (18. juni) held vi enno fast på, sjølv om det er litt avhengig av kva som skjer i desse koronatider, seier byggjeleiaren.