Spelar inn skrekkfilm på Valen

I desse dagar spelar Severin Eskeland inn skrekkfilm på faren sin gard på Valen. I ei av hovudrollene har han Brit Landa frå Halsnøy.

 

Utgangspunktet for Brit Johanne Eide Landa er Los Angeles, kor skodespelaren jobbar til dagleg. Men ei skrekkfilminnspeling på Valen fekk ho heimom denne sommaren.

– No har eg vore heime ein månads tid, og eg reiser tilbake til Los Angeles 5. august. Blei mindre tid heima enn eg har pleidd å ha, men det blir meir og meir arbeid i Los Angeles, så det blir vanskeleg å få til meir tid heime, forklarer Brit.

 

Filmar i USA

Avtalen om å spela inn film på Valen gjer mellom anna at filmen ho spelar inn i USA no måtte ta pause.

– Det var litt krise, men eg sa då me byrja på den filmen at eg hadde denne avtalen med Severin, og at det var noko me har planlagt lenge, og eg har sett veldig fram til det. Så me tar opp att hansken i Los Angeles når eg er tilbake, fortel Landa.

Der spelar ho rolla som CIA-agent i ein drama-/actionfilm.

– Det handlar om meksikanske immigrantar, ein politisk lada film der styresmaktene sit på begge sidene av ei konflikt, seier ho.

Filmen som blir spelt inn på Valen er ein skrekkfilm, og har fått tittelen «Allodium».

– Det er ein heilt annan film, men manuset er fantastisk. Då eg fekk sjå det, sa eg med ein gong at «dette må me laga film av». Me er begge tilknytt same selskap i LA, og får jobba litt saman, seier Landa.

– Det blir lange dagar, men eg elskar å vera på sett. Det er veldig spennande å få gjera noko her i desse traktene, og på denne eigedommen. Han passar ypparleg til denne sjangeren, og det er strålande at ein har tilgang til denne plassen, smiler ho.

 

Opprydding

Regissør Severin Eskeland er på heimebane, trass i at han er stordabu.

– Det er den andre heimebanen min. Eg har hatt lyst til å spela inn film her tidlegare, men pappa sa at då måtte det bli cowboyfilm, fortel Severin Eskeland, som er son av – nettopp – Severin Eskeland.

Då pappa døydde tenkte eg at eg endeleg kunne laga den skrekkfilmen eg har sett for meg å spela inn her. Pappa var ein skrotnisse som samla på alt mogeleg. No får me endeleg rydda her, men me har ikkje rydda alt, for noko måtte vera att som kulissar, legg han til.

Når eg ferdig med filmen, så blir det skikkeleg opprydding her. Då skal me laga det til ein ferieplass.

– Kvinnherad har vore veldig positive til oss. Kommunen gav oss kjærkomen pengestøtte, og me har fått matsponsing av Spar Valen, Pizzabakeren og Peppes, så me føler oss godt tatt i mot, rosar han.

Eskeland omtalar det som flaks at han trefte på Brit.

– Eg visste ikkje kven det var før eg for eit par år sidan fekk vita at det var ei jente frå Halsnøy som laga film. Måtte høyra med ho kva ho gjorde på, og møtte ho på ei norsk samling i Los Angeles. Då hadde eg skrive dette manuset, og me snakka om å gjera denne filmen. Så vart det til at me tok det no når ho skulle heimom ein tur, seier han.

 

Begeistra for Landa

Og regissøren er svært begeistra for Landa.

– Du får ei sånn god kjensle når du ser ho kan det. For ho er knallflink, konkluderer han.

Filmen blir ein kortfilm på 20-25 minutt, først og fremst eigna som ein festivalfilm.

– Men dette er kortfilmen. Me vil prøva å få lufta han borte i USA, slik at me får laga storfilm av det. Dette fungerer også som ein gjennomarbeidd skisse til full film, og det er mykje på den måten selskapa finn nye filmprosjekt. Dei gidd sjeldan å lesa heile manuset, men kortfilm har dei tid til, ler han.

Motspelaren til Landa er ingen ringare enn Helge Jordal.

– Eg er her éin dag og spelar inn. Me hadde eit prosjekt saman for lenge sidan, eit veldig bra manus han ikkje fekk noko støtte til. Det er kjekt å kunna hjelpa til litt når ungdommen kjem med bra ting. Kan eg bidra med noko, så er det berre bra det. Eg har jo vore filmstjerne ein gong, så det kan vera med og opna dører det, ler bergensaren.

Eskeland håpar å ha filmen ferdig til oktober.

– Men eg lovar ingenting! sluttar regissøren.