Senadin Foric satsar på røyr: – Eg skulle ha starta med det tidlegare

Senadin Foric frå Husnes starta for to veker sidan bedrifta SF Anleggsrøyr AS, og står no med begge beina godt planta i ein heilt ny bransje.

– Dei første to vekene har vore veldig bra. Eg har seld ein god del røyr og har sendt ut pristilbod på fleire, så det ser lovande ut. Det einaste eg angrar på er at eg ikkje starta med dette tidlegare, ler Senadin.

Utvikling

Vi møter den travle kremmaren i lokala han leiger i Bogsnes næringspark på Husnes.

– Eg skulle eigentleg ha vore på veg til Arendal no og henta ein bil. Samtidig skulle eg ha levert nokon store røyr til Grimstad, men det måtte venta, seier Senadin.

Grenda har tidlegare snakka med Senadin, som har gjort levebrød ut av bilhobbyen sin. Kor han kjøper brukte norske bilar og eksporterer dei til Bosnia. Sidan då har han utvida tilbodet og leverer no også traktorarar og anleggsmaskinar.

Men store doningar på fire hjul var ikkje nok.

– Vi bur jo i Kvinnherad og er avhengige av utvikling. Det er ingen andre som sel anleggsrøyr som dette i kommunen, før eg starta så måtte ein til Stord for å få tak i slike. Difor trur eg absolutt at det er ein marknad for dette her. Når eg har røyra på lager i Bogsnes så treng ikkje folk å reisa ut av kommunen for å kjøpa anleggsrøyr, slår han fast.

Vil byggja sitt eige

Rundt om inne i næringslokalet i Bogsnes ligg røyra tett i tett. Store, små, lange og korte. Og dei er mange.

– Eg har røyr til vatn, drenering, kloakk og så har eg isolasjon. Eigentleg er det alt til grunnarbeid og slikt, seier Senadin.

Per no har han ingen planar om at den nye næringa skal erstatta bilbusinessen, men på sikt trur han at røyrbedrifta vil eta mesteparten av tida hans.

– Eg har ikkje noko mål om å berre leva av røyr, men eg trur at det vil ta meir og meir tid. For når det kjem lastebilar hit for å henta røyr, så må eg jo vera til stades og hjelpa med lastinga, seier han.

– Kan det ikkje bli mykje rør med deg når du har så mange ballar i lufta?

– Eg håpar ikkje det. Det blir jo travelt og mykje jobb heile tida, men det er noko eg trivst med. Det einaste eg skulle ynska var at det var fleire timar i døgeret, smiler han.

Kanskje vil det bli litt meir effektivt den dagen han får samla begge bedriftene sine under same tak. I dag har han bil-bedrifta si like ved Hydro Husnes og SF Anleggsrøyr i eit leigd lokale i Bogsnes.

– Planen er at eg skal byggja for meg sjølv i Podlen på Husnes. Det jobbar eg med no om dagen, og eg håpar det skal gå i orden, så får vi sjå. Enn så lenge så går det fint å putla litt på her og litt der, sluttar Senadin.