Senadin lever av å eksportera bilar til Bosnia

Senadin Foric (20) frå Husnes har skapt sin eigen arbeidsplass gjennom kjøp og sal av bilar, hovudinntekta kjem frå bileksport til Bosnia.

Gjennom firmaet Foric Performance har bilinteresserte Senadin skapt sitt eige levebrød. Det gjennom kjøp, sal og utleige av alt av motoriserte køyretøy.

– Alt som står rundt her er ting eg har kjøpt inn, så det er både bilar, traktorar, gravemaskinar og anna. Faktisk så har eg begynt å kjøpa inn minibussar òg no, smiler han.

Grenda møter Senadin på området han disponerer i skogen ovanfor administrasjonen til Hydro Husnes. Her står det tett i tett med køyretøy til alle formål, blant anna ei rad med traktorar.

– Eg har bilar ståande i Trondheim, Oslo, Stavanger, ja, eigentleg litt over alt i landet, så dette er berre litt av det eg har, seier han.

 

Jobbar smart

Etter å ha fått smaken på denne næringa allereie i 15-årsalderen, då han i det små starta med kjøp og sal av mopedar, etablerte Senadin firmaet Foric Performance tilbake i 2018. I dag jobbar han fullt som einaste tilsette i firmaet.

– Det er travelt, så eg bør kanskje sjå meg om etter ein kollega snart, ler han.

– Korleis får du inntekter?

– Det handlar eigentleg om at eg kjøper ein ting billegare enn eg sel han. Det er kanskje enklare sagt enn gjort, men eg jobbar smart og sel alltid før eg kjøper. Det er viktig om det skal gå bra, seier 20-åringen.

Sjølv har Senadin aldri hatt ein anna jobb enn dette, og han trivst veldig godt med å vera sin eigen sjef.

– Eigentleg så trur eg at det er dette her eg er fødd for å gjera. Eg stortrivst endå i alle fall, men det var jo aldri planen at det skulle bli så stort som dette. Eg skulle jo berre halda på med dette på sida av ein anna jobb, men så balla det berre meir og meir på seg. Sjølvsagt er det ingenting som er betre enn det, men det blir jo litt travelt, slår han fast.

 

Viktig å pruta

For om Senadin ikkje skal gå glipp av det store bilkuppet, må han vera klar for handel berre sekundar etter at annonsen blir lagt ut på Finn.

– Eg har vakna midt på natta av eit Finn-varsel og enda opp med å kjøpa ein bil før eg sovna igjen. Ein må følgja med til kvar ei tid, her er det sekundar som tel. Er du litt for seint ute så kan bilen eller traktoren allereie vera seld når du prøver deg, seier han.

Medan vi pratar tikkar den eine meldinga etter den andre inn på telefonen til bilhandlaren. Det er nye annonsar på Finn han burde sjekka ut, men akkurat no var det ingenting som fanga ungguten si interesse.

– Det var for dyrt, ler han og legg til.

– Men sjølv om det er for dyrt så kan ein alltid prøva å pruta litt. Det er noko ein blir betre på etter kvart, og det er eit must å kunna når ein held på med dette. Visst ikkje eg får pruta så droppe eg handelen. Det treng ikkje å vera mykje, men ein femhundrelapp her og ein femhundrelapp der blir til slutt ein god slump med pengar, seier 20-åringen.

 

Ærlegdom varar lengst

Sidan han gjorde dette til eit levebrød tilbake i 2018, har han på kort tid gjort namnet sitt kjend både i Norge og Bosnia, landet han og familien hans kjem frå.

– Når folk er nøgd så spreiar det seg fort. Og for å få folk nøgd så må ein vera ærleg, er du ikkje det så kan du ikkje halda på med dette. Er eine lyspæra gått på bilen du skal selja, så må du seia ifrå om det. Prøver du å lura nokon, så er det til slutt berre deg sjølv du lurer. Då vil ikkje folk handla med deg neste gong, seier han bestemt før han går bort til ein sølvgrå stasjonsvogn som står midt på området.

– Denne kjøpte eg frå Røsslandslia for eit par dagar sidan. Den er seld og klar for transport til til Bosnia, det er dit eg sel mesteparten av bilane mine. Det er ikkje mykje som er dyrare i Bosnia enn i Norge, men bil er faktisk det, smiler kremmaren.

Når det kjem til dei vidare framtidsplanane i bedrifta, har den unge og smilande bruktbilhandlaren verken plotta ned langsiktige mål eller store draumar.

– Nei, eg lev vel mest i noet og tek ting som det kjem. Eg er heldig som kan putla på med noko eg verkeleg likar, samtidig er eg fullt klar over at ting kan snu fort. Sånn er det i denne bransjen, ein veit aldri kva som kjem ut for sal, men enn så lenge så har det gått veldig bra, sluttar Senadin.